पोखरा ।
कालिका माध्यमिक विद्यालय पोखरा १० रामबाजार ले वडाका जनप्रतिनिधिलाई सम्मान गरेको छ । कार्यक्रममा पोखरा १० का वडाध्यक्ष राजेश गुरुङले आफूले लामो समय शिक्षकको रुपमा काम गरेको स्मरण गर्दै वडा र विद्यालयबीच नङ र मासुको सम्बन्ध हुने बताए ।

उनले आगामी दिनमा गरिब तथा जेहेन्दार विद्यार्थीलाई लक्षित गरी विशेष कार्यक्रम ल्याउने घोषणा गरे । विद्यालयका सहायक प्रधानाध्यापक श्रीराम आचार्यले आफ्नो विद्यालयका भूपू शिक्षक वडाध्यक्ष निर्वाचित हुँदा निकै खुसी लागेको बताए । उनले स्कुल र कलेजको भौतिक तथा गुणस्तर अभिवृद्धिका लागि वडा कार्यालयको साथको अपेक्षा गरे ।

कालिका पब्लिक कलेजका क्याम्पस प्रमुख ज्योतिबाबु पौडेलले कालिका मावि र कालिका पब्लिक कलेजले शैक्षिक गुणस्तर निकै फड्को मारेको उल्लेख गरे । उनले सबै अभिभावक, शिक्षक, विद्यार्थी र सरोकारवालाको प्रयत्नले यहाँसम्म आइपुगेको बताए ।

कार्यक्रममा विद्यालयका प्रवि इन्चार्ज विजयलक्ष्मी कोइराला र वडा सदस्य नरदेवी गुरुङ, प्रधानाध्यापक बलराम गिरी, सहायक प्रधानाध्यापक वासुदेव अधिकारी लगायतले बोलेका थिए । कार्यक्रमको अध्यक्षता विद्यालय व्यवस्थापन समिति अध्यक्ष दीपकबहादुर थापाले गरेका थिए ।