पोखरा । आगामी चुनावमा कास्की २ बाट शिरीष गुरुङले चुनाव लड्ने घोषणा गरेकी छन् । प्रतिनिधि सभा चुनावमा स्वत्नत्र उम्मेदवारी दिने उनले घोषणा गरेकी हुन् ।

गुरुङले जागौं पोखरा अभियानको नेतृत्व गर्दै केही समय अघि ५१ दिन लामो शान्तिपूर्ण धर्ना समेत बसेकी थिइन् । हाल शिक्षण पेशामा आबद्ध गुरुङले देशमा पार्टीवाद हाबी भएकाले यो भत्किनु जरुरी ठानेर उम्मेदवारी दिने घोषणा गरेको बताइन् ।

‘अभियन्ता बनेर अभियान चलाएर पनि परिवर्तन हुन सकेन । त्यसैले पनि मैले उम्मेदवारी दिने निर्णय गरेर आगामी चुनावमा कास्की २ बाट प्रतिनिधि सभा सदस्य पदका लागि चुनाव लड्ने घोषणा गरेको छु,’ उनले भनिन् । अहिले लहडमा उम्मेदवारी दिने बाढी नै आएको छ । तर, आफूले लहडमा आएर चर्चा कमाउन उम्मेदवारी दिने घोषणा नगरेको उनले सुनाइन् ।

हाल न्यु ग्यालेक्सी र फिस्टेल हस्पिटालिटी म्यानेजमेन्टमा अध्यापन गराइरहेकी गुरुङ बिएलएलबी पढिरहेकी छिन् । कास्कीबाट आगामी निर्वाचनका लागि उम्मेदवारी घोषणा गर्ने उनी पहिलो हुन् ।