पोखरा ।
पोखरामा ताल छेउमा होटल, रेस्टुरेन्ट तथा रिसोर्ट धेरै छन् । पोखरा उपत्यकाबाहिर पोखरा २५ सुईखेत खोला छेउमा सुईखेत रिभर भ्याली रिसोर्ट सञ्चालनमा आएको छ । रिसोर्टले पर्यटकको मन जित्न सफल भएको छ । रिसोर्टमा राखिएको एटिभी बाइक राइड र स्विमिङ पुलसँगै रहेको प्राकृतिक मनोरम दृश्यले आगन्तुकलाई लोभ्याउने गरेको छ । खोलाको छेउमा हरियाली वातावरणमा रमाउन चाहनेलाई लक्षित गरी रिसोर्ट सञ्चालनमा ल्याएको सञ्चालक जितेशमान गुभाजुले बताए ।

१५ रोपनीमा ५ करोड लगानीमा सञ्चालनमा आएको सुइखेत रिभर भ्यालीबाट बिहानीको सूर्याेदय र बेलुकाको सूर्यास्तको रमणीय दृश्य देखिन्छ । रिसोर्टमा आउने पर्यटकलाई सुइखेतमा मात्रै सीमित नबनाउने उद्देश्यले एटिभी बाइकको माध्यमबाट हेम्जाकोट हुँदै अस्तामसम्मको प्याकेज सञ्चालन गरिरहेको उनले बताए । अस्ताममा पुगेपछि त्यहाँबाट उत्तरमा रहेका हिम श्रृङखलासँगै हेमजा फाँट, पर्यटकीय गाउँ धम्पुस र पोखराको उत्तरी भेग अवलोकन गर्न सकिन्छ ।

छोटो दूरीमा एटिभी बाइक चलाउनेले सुईखेत रिभर भ्याली हुँदै फेदीसम्मको यात्राको अनुभव लिन सक्छन् । रिसोर्टमा बस्ने पाहुनाले हाइकिङ गरी कास्कीकोट दरबार, अस्तामसम्म जाने विकल्प पनि छ । रिसोर्टमा स्विमिङ पुलसमेत छ । जसका लागि पनि विभिन्न प्याकेजको व्यवस्था गरिएको छ । रिसोर्टमा हाल ६ रुम छन्, जसमा बस्न चाहनेका लागि समेत विभिन्न प्याकेजको व्यवस्था गरिएको अप्रेसन म्यानेजर सागर गुरुङले बताए ।

यहाँका केही कटेजले मधेसको थारु बस्तीको झल्को दिने गरेको छ । बाल उद्यानसमेत रहेकाले पारिवारिक वातावरणमा घुम्न आउनेका लागि समेत रिसोर्ट उपयुक्त छ । साँझमा बार वे क्युसँगै स्विमिङको समेत व्यवस्था छ । यहाँ अहिले २० जनाले प्रत्यक्ष रोजगारी पाएका छन् ।