जोमसोम–कागबेनी सडक अस्फाल्ट पिच गर्न आधा घटेर ठेक्का लिएको कम्पनीले समय आधा सकिँदासम्म मजदूर र उपकरणसमेत ल्याएको छैन

सुन्दरकुमार थकाली
जोमसोम ।
कालिगण्डकी करिडोर (बेनी जोमसोम कोरला) सडक अन्तर्गत जोमसोम कागबेनी १३ किमी अस्फाल्ट सडकमा सुरुआती चरणमै ढिलासुस्ती भएको छ । मुस्ताङको उत्तरी कोरला नाका र प्रसिद्ध धार्मिक स्थल मुक्तिनाथ मन्दिर जोड्ने सडकको कालोपत्र गर्ने सम्झौता अवधि २ वर्ष छ ।

सम्झौता भएको १० महिना बितिसक्दासमेत निर्माण कम्पनीले ३ प्रतिशतमात्र भौतिक प्रगति गरेको आयोजनाले जनाएको छ । राष्ट्रिय गौरवको जोमसोम कोरला ग्राभेल सडकका ७ खण्डमध्ये ६ वटा खण्ड ३ वर्षअघि नै कालिगण्डकी करिडोरलाई हस्तान्तरण भएका छन् ।

जसमध्ये जोमसोम कोरला सडकको चराङ छोसेर २५ किमी ग्राभेल सडकको काम अन्तिम चरणमा छ । जोमसोम कोरला ग्राभेल सडक अन्तर्गत नेपाल सरकार भौतिक पूर्वाधार तथा यातायात मन्त्रालयले आर्थिक वर्ष २०७८ असोज ४ गते कालोपत्र गर्न बजेट विनियोजन गरेको थियो । जोमसोम कागबेनी १३ किमी कालोपत्र सडक लगायतका संरचना निर्माण गर्न आयोजनाले रौटाहा आत्रेय सारस जेभी काठमाडौंसँग २८ करोड १४ लाखमा ठेक्का सम्झौता गरेको थियो ।

२०७८ असोज ४ गते ठेक्का सम्झौता भएको जोमसोम कागबेनी सडकको अवधि ०८० असोज ४ सम्म छ । सरकारले जोमसोम–कागबेनी ग्राभेल सडक थप स्तरोन्नति गर्दै अस्फाल्ट कालोपत्र गर्न ५७ करोड ९८ लाख बजेट विनियोजन गरेको थियो । तर निर्माण कम्पनीले कुल लागतको करिब ५० प्रतिशत रकम घटेर ठेक्का सम्झौता गरेको थियो ।

सम्झौता अवधि अझै १४ महिना बाँकी रहे पनि निर्माण कम्पनीले सुरुआती चरणमै काममा ढिलासुस्ती गरेको हो । निर्माण कम्पनीले सम्झौता भएबाट हालसम्म कम्तीमा ३५ देखि ४० प्रतिशत भौतिक प्रगति गर्नुपर्ने थियो । तर कम्पनीले कालोपत्रका लागि आवश्यक मजदुर र उपकरणसमेत फिल्डमा व्यवस्थापन गर्न सकेको छैन ।

निर्माण कम्पनीले प्राविधिक खटाएर गत वर्षको भदौमा १३ किमी सडक सर्भे गरेको थियो । जोमसोम कागबेनी १३ किमी सडक अन्तर्गत कागबेनी गाउँदेखि मुल सडकको १ किमी जोडिने गरी आयोजनाले ठेक्का लगाएको थियो । जोमसोम कागबेनी कालोपत्रे सडक विस्तार गर्न कालिगण्डकी नदीले ग्रोभल सडकमा क्षति पुर्‍याएको स्थान, सडक चौडा गर्ने, सडकको ग्रेड मिलान गर्ने, ड्रेन तथा वाल निर्माण लगायतका काम गर्ने सम्झौता छ ।

आयोजना प्रमुख जगत प्रजापतीले जोमसोम–कागबेनी कालोपत्र सडकको भौतिक प्रगती जम्मा ३ प्रतिशतमात्र भएको जानकारी दिए । गत वर्षको असोजमा ठेक्का सम्झौता भएको सडकको कामका लागि निर्माण कम्पनीले २७ लाख रकम भुक्तानी लिएको छ । ‘कोरला मुक्तिनाथ जोड्ने महत्वपूर्ण सडकको १३ किमी कालोपत्र योजनाअघि बढेको छ, निर्माण कम्पनीले अपेक्षा अनुसार कामलाई गति दिएको छैन, काम छिटो छरितो होस् भन्ने हाम्रो ध्येय हो,’ उनले भने ।

यता, सडकको जिम्मा लिएका रौटाहा आत्रेय सारस जेभीका प्रतिनिधि राजेश कुँवरलाई सडकको ढिलासुस्तीबारे पटक पटक टेलिफोन सम्पर्क गर्दासमेत उनी सम्पर्कमा आएनन् ।