पोखरा ।
पछिल्लो २४ घन्टामा देशभरमै सबैभन्दा धेरै पानी पोखरामा परेको छ । जल तथा मौसम विज्ञान विभागले पाेखरामा सबैभन्दा धेरै पानी परेको जनाएको छ ।

मौसम विभागको वेबसाइटमा पोखरा क्षेत्रलाई रातो संकेत सहित खतरामा रहेको जनाइएको छ । पछिल्लो २४ घण्टामा पाेखराको लामपाटनमा सबैभन्दा धेरै ३३४.६ मिलिमिटर वर्षा मापन भएको विभागले जनाएको छ ।

२४ घन्टाभित्र १४० मिलिटर वर्षा हुनुलाई खतरा मानिन्छ । तर त्यसको दोब्बरभन्दा धेरै पानी परेको रेकर्ड लामपाटनमा मापन भएको छ । यहाँ १२ घण्टामै ३१३ मिलिमिटर पानी परेको छ । १२ घण्टामा १२० मिलिमिटरभन्दा धेरै पानी पर्नुलाई खतरा मानिन्छ ।

कास्की पछि देशमा सुनसरी, चितवन र झापामा धेरै वर्षा भएको छ । चितवनको शक्तिखोरमा २४ घण्टामा १९५.६ र १२ घण्टामा १८२.६ मिलिमिटर, इटहरीको तरहरामा २४ घण्टामा १७२ मिलिमिटर र झापाको दमकमा १२ घण्टामा १२०.४ मिलिमिटर वर्षा मापन भएको छ ।

पोखराको लेकसाइडमा पहिरोले पुरेर आइतबार राति १ जनाको ज्यान गइसकेको छ । २ जना घाइते भएका छन् । पोखरा १३ कमलपोखरी क्षेत्रमा सयभन्दा बढी घर जलमग्न भएका छन् ।