जोमसोम– म्याग्दी र मुस्ताङको सीमाना काभ्रेभीर सडकमा भिषण सुख्खा पहिरो गएको छ । बेनी–जोमसोम ७६ किमी सडकको काभ्रेभीर सडकमा सोमबार बिहान करिव ११ बजे भीषण पहिरो गएको मुस्ताङका संघीय सांसद प्रेमप्रसाद तुलाचनले जानकारी दिए ।
काभेभीर सडकको सीमाना नजिक पैरोथाप्ला जाने झोलुङ्गे पुल देखि उत्तरतर्फ करिव ५ सय मिटर मुस्ताङ तर्फको सडकमा सुख्खा पहिरोले सडक पुरिएको हो । सांसद तुलाचन बिहान ११ बजेतीर गएको सुख्खा पहिरो अझै पूर्ण रुपमा नरोकिएको बताए ।
म्याग्दी र मुस्ताङको सीमाना काभ्रेभीरमा सुख्खा पहिरो गएपनि कालिगण्डकी नदी फराकिलो स्थानमा भएकाले कालिगण्डकी नदी थुनिने खतरा नरहेको सांसद तुलाचनले उल्लेख गरे ।काभ्रेभीर सडक माथिबाट ठुलो चट्टान र माटो सहित पहिरो खसेको उनले बताए । सुख्खा पहिरोले सडक अवरुद्ध भएको छ, अझै पहिरो खस्दैछ ,उनले भने,अब एक साता बढी सडक खुलाउन नसक्ने अवस्था छ ।’
यस्तै, बेनी–जोमसोम कोरला सडकका आयोजना प्रमुख जगत प्रजापतीले काभेभीरमा भिषण पहिरो गएपछि सडक अवरुद्ध भएको बताए । उनले सडक सचारु गराउन केही दिन लाग्नसक्ने बताए ।
यसअघि मुस्ताङको थासाङ गाउँपालिका–३ कैकु खोलामा बाढीले सडक क्षति हुँदा सडक अवरुद्ध भएको थियो । कैकु खोलामा सडक अवरुद्ध भएकाले म्याग्दीबाट काभ्रेभीर हुँदै सवारी माथि जान पाएका थिएनन् । सुख्खा पहिरोले कुनै मानवीय तथा अन्य धनजनको क्षति नभएको आयोजना प्रमुख प्रजापतीले बताए ।