पोखरा ।
पोखराको सभागृहचोकमा केन्द्रीय कार्यालय रहेको ग्रीन डेभलमपमेन्ट वैंक लिमिटेडले मादी गाउँपालिका ७ को खानेपानी उपभोक्ताका लागि टंकी प्रदान गरेको छ । स्थानीयलाई शुद्ध खानेपानी उपलब्ध गराउने उद्देश्यले २ हजार लिटरका २ र हजार लिटरको १ टंकी लेखनाथ खानेपानी उपभोक्ता संस्थामार्फत् किन्न ६० हजार सहयोग गरिएको हो ।

सोमबार आयोजित कार्यक्रममा बैंकका कायम मुकायम प्रमुख कार्यकारी अधिकृत हरिबहादुर बुढाथोकीले लेखनाथ खानेपानी उपभोक्ता संस्थाका अध्यक्ष मुरारी शर्मालाई बैंकको सामाजिक उत्तरदायित्व अन्तर्गत रकम हस्तान्तरण गरेका हुन् । बुढाथोकीले लेखनाथवासीलाई मात्र नभई आसपासका क्षेत्रमा समेत स्वच्छ पानीको व्यवस्थापनमा लेखनाथ खानेपानी उपभोक्ता संस्था सफल रहेको बताए ।

खानेपानी संस्थाका अध्यक्ष शर्माले बैंकसमेत जनतालाई शुद्ध खानेपानी उपलब्ध गराउने अभियानमा सहभागी भएकोमा खुसी व्यक्त गरे । उनले आगामी दिनमा समेत सहकार्यको अपेक्षा गरे । बैंकले हाल कास्की, बागलुङ, म्याग्दी, तनहुँ र नवलपुरमा रहेका १६ शाखाबाट सेवा दिइरहेको छ ।