जोमसोम ।
कालिगण्डकी करिडोर (बेनी जोमसोम कोरला) सडक आयोजनामा ५ अर्ब ८४ करोड खर्च भएको छ । कोरला नाकासम्मको सडक पहुँच विस्तार गर्न आयोजनाले सडक तथा पुलमा यति रकम खर्च गरेको हो । भारतीय नाकाबन्दीपछि सरकारले चीनसँग व्यापार तथा पारवाहन मार्ग विस्तार गर्ने उद्देश्यले यो आयोजना सुरु गरेको थियो । आयोजनाको लागत १० अर्ब ३५ करोड रहेकोमा ७ अर्ब ५५ करोडमा विभिन्न निर्माण कम्पनीसँग ठेक्का सम्झौता भएको थियो ।

आयोजनाको हालसम्मको भौतिक प्रगति ७५ प्रतिशत छ । आयोजनाले सडकतर्फ ६ अर्ब ३१ करोडको ठेक्का सम्झौता गरेकोमा ५ अर्ब २ करोड र पुलतर्फ १ अर्ब २४ करोड बजेटको ठेक्का सम्झौता गरेकोमा ८२ करोड खर्च भएको सडक आयोजनाका प्रमुख जगत प्रजापतीले जानकारी दिए । सडकतर्फ ८० प्रतिशत र पुलतर्फ ६६ प्रतिशत भौतिक प्रगति भएको छ । आयोजनाले हालसम्म ठेक्का सम्झौता गरेको बजेटमध्ये अझै १ अर्ब ७१ करोड बजेट बराबरको काम हुन बाँकी छ ।

सरकारले आर्थिक वर्ष ०७९/०८० का लागि आयोजनालाई १ अर्ब ३८ करोड ७६ लाख बजेट विनियोजन गरेको छ । यो सडक आयोजना ०७४ देखि सुरु भएको हो । पछिल्लो समय गौरवको सडक अन्तर्गत मालढुंगा बेनी १३ किमी र जोमसोम कागबेनी १३ किमी सडक कालोपत्र गर्ने योजना थपिएको छ । यसअघि बेनी गलेश्वर ४ किमी सडक स्तरोन्नतिको जिम्मा पूर्वाधार विकास कार्यालय म्याग्दीले लिएकोमा सो सडक पनि अहिले कालिगण्डकी करिडोरलाई नै जिम्मेवारी हस्तान्तरण भइसकेको छ ।

बेनी–जोमसोम ७४ किमी सडकको लागत ३ अर्ब ४३ करोड रहेकोमा २ अर्ब ८० करोडमा ठेक्का सम्झौता भएको थियो । बेनी जोमसोम ४ खण्डमा काम भइरहेकोमा ठेक्का रकमको २ अर्ब २० करोड खर्च भइसकेको छ । बेनी जोमसोम ७४ किमी कालोपत्र सडकको भौतिक प्रगति ७५ प्रतिशत छ भने वित्तीय प्रगती ७० प्रतिशत छ । जसअन्तर्ग बेनी जोमसोम ७४ किमी सडकमध्ये हालसम्म २६ किमी सडकमा कालोपत्र भइसकेको छ ।

पटक पटक म्याद थपिँदै आएको बेनी जोमसोम सडकको ०७९ असार मसान्तसम्म पुन म्याद थप भइसकेको आयोजना प्रमुख जगत प्रजापतीले जानकारी दिए । यो सडक अहिले निर्माणको अन्तिम चरणमा छ । जोमसोम कोरला १ सय १० किमी सडकका ७ खण्डमध्ये ६ खण्डको काम सकेर कालिगण्डकी करिडोरलाई हस्तान्तरण भइसकेको छ । चराङ छोसेर २५ किमी सडकको भौतिक प्रगति ९० प्रतिशत छ ।

यो खण्ड चालु आर्थिक वर्षभित्र सकिने प्रजापतिले बताए । जोमसोम–कोरला सडकको समग्र भौतिक प्रगति ९८ प्रतिशत छ । जोमसोम कोरला सडकको लागत ४ अर्ब १५ करोड रहेकोमा २ अर्ब ६५ करोडमा ठेक्का सम्झौता भएको थियो ।
पर्वतको मालढुंगादेखि बेनीसम्म १३ किमी स्तरोन्नतिसहित अस्फाल्ट पिच गर्न ९९ करोड लागत स्टमेट गरिएकोमा ५२ करोडमा ठेक्का सम्झौता भएको छ । अहिले यो सडकको भौतिक प्रगति २० प्रतिशत छ ।

बेनी जोमसोम कोरला सडकमा १९ वटा पुल छन् । जसमध्ये ५ पुल बनिसकेका छन् भने बाँकी १४ पुल निर्माणाधीन छन् । म्याग्दीतर्फ २ वटा र मुस्ताङतर्फ ३ पुल सम्पन्न भएको आयोजना प्रमुख प्रजापतीले बताए । म्याग्दी खण्डको राहुघाट खोला र म्याग्दी दानाको घट्टे खोलामा पक्की पुल बनेका छन् । मुस्ताङखण्डतर्फ लेते खोला, स्याङ खोला र पान्डा खोलामा पुल बनिसकेका छन् ।