पोखरा ।
नागरिकतासम्बन्धी विधेयक फिर्ता लिन माग राख्दै क्षत्री समाज नेपाल कास्कीले प्रधानमन्त्री शेरबहादुर देउवालाई ज्ञापनपत्र पठाएको छ । समाजले देशव्यापी रुपमा कोणसभासमेत गरेको छ । कास्कीका प्रमुख जिल्ला अधिकारी जयनारायण आचार्यमार्फत प्रधानमन्त्री देउवालाई ज्ञापनपत्र पठाएको क्षत्री समाज नेपाल कास्की अध्यक्ष पदमबहादुर कार्कीले जानकारी दिए ।

विदशीलाई सहज रुपमा नागरिकता दिने प्रावधान सहितको विधेयक प्रतिनिधि सभा तथा राष्ट्रिय सभाबाट पारित भएदेखि क्षत्री समाजले यथाशीघ्र फिर्ता लिन माग गर्दै आएको छ । क्षत्री समाज नेपालका केन्द्रीय अध्यक्ष प्राडा दिलबहादुर क्षत्रीले विधेयक फिर्ता लिन दबाब दिन सबै जिल्लाका प्रमुख जिल्ला अधिकारीमार्फत प्रधानमन्त्री देउवालाई ज्ञापनपत्र बुझाएको बताए । उनले पहिलो चरण अन्तर्गतको ज्ञापनपत्र बुझाउने कार्यक्रम गरेको जानकारी दिए । जनतासँग माफ मागेर फिर्ता नलिए दोस्रो चरणमा आन्दोलनमा जाने चेतावनी दिए ।

क्षत्री समाजले विदेशी महिलासँग वैवाहिक सम्बन्ध कायम हुनासाथ नागरिकता दिन सकिने प्रावधान गलत भएको टिप्पणी गरेको छ । ‘नागरिकता जस्तो राष्ट्रिय महत्वको विषयलाई बेवास्था गर्दै राष्ट्रिय स्वाधीनता तथा अखण्डतामाथि आँच आउने गम्भीर प्रकृतिको विधेयक फिर्ता नलिए राष्ट्रवादी नेपालीलाई समेटेर आन्दोलनमा जाने छौं,’ ज्ञापनपत्रमा भनिएको छ, ‘नेपालको संविधान २०७२ को भाग २ उपधारा (३)मा भएको व्यवस्थाभित्र बाहेकका अन्य व्यक्तिलाई नागरिकता दिन सहज बनाइनु गलत छ ।

सो उपधारामा संविधान प्रारम्भ हुनुभन्दा अगाडि जन्मेको आधारमा नेपालको नागरिकता पाएको नागरिकका सन्तानले बाबुआमा दुबै नेपालको नागरिक रहेछ भने बालिक भएपछि वंशजको आधारमा नागरिकता पाउने व्यवस्था गरेको छ ।’