पोखरा ।
पोखरामा श्रीमद् बितक चर्चा शब्द दर्शन तथा श्रीकृष्ण कथा कार्यक्रम जारी छ । पोखरा ८ रत्नचोकस्थित श्री कृष्ण प्रणामी मन्दिरको आयोजनामा साउन २ देखि कार्यक्रम सुरु भएको हो । कार्यक्रम भदौ ३ गतेसम्म चल्नेछ । भदौ ३ गते श्रीकृष्ण जन्माष्टमी प्राकट्य महोत्सव पनि गरिनेछ । कार्यक्रममा गुरुजी बाणी तथा बितक कथाकार युवा धर्म प्रचारक श्री श्यामदास महाराजले संगीतमय कथा प्रवचन गरेका छन् ।

‘धार्मिक तथा आध्यात्मिक जागरणका लागि कार्यक्रम महत्वपूर्ण रहने मन्दिरका अध्यक्ष पुरुषोत्तम रेग्मीले बताए । उनले भने, ‘कार्यक्रममा सहभागी भएर पुण्यलाभ गर्न अनुरोध गर्दछौं ।’ कार्यक्रम हरेक दिन बिहान ११ देखि दिउँसो २ बजेसम्म चल्नेछ । दैनिक करिब ३ सय भक्तजनको सहभागिता रहने अनुमान गरिएको छ । हालसम्म ६ हजार बढी भक्तजनले कार्यक्रममा सहभागिता जनाएको मन्दिरका सचिव देवीप्रसाद खतिवडाले जानकारी दिए ।

मन्दिर स्थापना काल २०४८ सालदेखि नै वर्सेनि कार्यक्रम गर्ने गरिएको छ । यो ३१ औं कार्यक्रम हो । साउन २७ गते रक्षबन्धनका दिन विशेष कार्यक्रम हुने तय छ ।