पोखरा ।
गण्डकी प्रदेश सरकारका अर्थमन्त्री रामजीप्रसाद बराल ‘जीवन’ले पोखरा २२ मा निर्माण हुन लागेको नेटा लुकुन्स्वाँरा वडादेखि पुम्दीकोटसम्म पिच सडक गर्न रकम अभाव नहुने आश्वासन दिएका छन् । पिच सडकको बुधबार शिलन्यास गर्दै मन्त्री बरालले पुम्दीभुम्दीको रणनीतिक महत्व रहेको जनाउँदै त्यहाँ जान सहज सडक जरुरी भएको बताए ।

सडक विस्तारका क्रममा जग्गा उपलब्ध गराउनेले नै पहिला प्रतिफल पाउने भएकाले विकास लागि सहयोग गर्ने सबैलाई उनले आग्रह गरे । समयमै उक्त परियोजना सम्पन्न गर्न सबैको सकरात्मक भूमि आवश्यक भएको मन्त्री बरालको भनाइ छ । पुम्दीकोटमा विशाल महादेवको मुर्ति निर्माणले हाल पुम्दीभुम्दीको पहिचान बढेको उनले जनाए ।

छोरोपाटन, खाल्से हुँदै कुभिन्डे सडक निर्माण प्रक्रियासमेत अघि बढेको उनले जनाए । मन्त्री बरालले पोखराको मुख्य बजारदेखि नजिक भएर पनि यस क्षेत्रको विकासमा रणनीतिक महत्वका सडक निर्माण नहुँदा धेरै पछि परेको उनको ठम्याइ छ ।

सडकका लागि जग्गा दान गर्नेहरुलाई पोखरा २२ वडा कार्यालयले एक समारोहका बीच सम्मान गर्ने वडाध्यक्ष हिमलाल बरालले जानकारी दिए । निर्माण कम्पनी एमएस फेवा पिएल जेभी पोखराका प्रेम पहारीले उक्त परियोजनामा कुनै बाधा, अवरोध नभए आउँदो असारभित्र सकिने उल्लेख गरे । पूर्वाधार विकास कार्यालय कास्कीका इन्जिनियर हरि थापाले करिब साँढे ३ किलोमिटरको यो सडक ८ मिटर चौडा छ ।

२०८१ साउन १ गतेभित्र सक्ने गरी निर्माण कम्पनीले ९ करोड ८८ लाखमा निर्माण गर्ने सम्झौता । अबको ११ महिनामा नेटा लुकुन्स्वाँरा पोखरा २२ को वडादेखि पुम्दीकोटसम्म पिच सडक निर्माण भइसक्ने निर्माण कम्पनीका मिरकुमार राईले बताए । यो सडक निर्माण भएसँगै पुम्दीभुम्दीको विकासमा थप टेवा पुग्ने पुम्दीकोट कोट विकास समिति अध्यक्ष चन्द्रकान्त बरालले बताए । उक्त सडक निर्माणमा आफूहरु कटिवद्ध भएको स्थानीय नवराज बरालले उल्लेख गरे ।