पोखरा l
पोखरामा प्रथम राष्ट्रिय खुला स्नुकर प्रतियोगिता भदौमा हुने भएको छ । डेभिज स्नुकर क्लबको आयोजना तथा युवा तथा खेलकुद मन्त्रालय, गण्डकी प्रदेश, पोखरा महानगरपालिका खेलकुद विकास समिति, नेपाल विलियार्डस् स्नुकर तथा पुल संघ र कास्की जिल्ला विलियार्ड स्नुकर तथा पुल संघको सहयोगमा भदौ १२ देखि १९ गतेसम्म प्रतियोगिता सञ्चालन हुनेछ ।

आयोजक डेभिज स्नुकर क्लबले आइतबार पत्रकार सम्मेलन गर्दै भौगोलिक तथा आर्थिक रुपले सुहाउँदो विलियार्ड, स्नुकर खेललाई नगर, क्षेत्र, जिल्ला र राष्ट्रसम्म पुर्‍याउने उद्देश्य प्रतियोगिता आयोजना गरिएको जनाएको छ ।आन्तरिक तथा वाह्य पर्यटनलाई आकर्षित गर्न प्रतियोगिताले महत्वपूर्ण भूमिका खेल्ने क्लबको सञ्चालक तथा प्रतियोगिता संयोजक शंकर गुरुङले बताए । राष्ट्रका लागि खेलकुद, स्वास्थ्यका लागि खेलकुद भन्ने नारी सहित आयोजना गरिएका उक्त प्रतियोगिताको विजेतालाई नगद १ लाख ५१ हजार १११ सहित सिल्ड, मेडल र प्रमाण पत्र हात पार्नेछ ।

उपविजेताले नगद ७१ हजार १११ सिल्ड, मेडल र प्रमाणपत्र प्राप्त गर्नेछ । सेमिफाइनलिस्ट २ जनाले नगद ११ हजार १११ सहित शिल्ड र प्रमाण पत्र पाउनेछन् । हाइयस्ट ब्रेकरलाई २१ हजार १११ सहित शिल्ड, मेडल र प्रमाणपत्र प्रदान गरिने आयोजकले जनाएको छ । प्रतियोगिताका खेल पोखरा महानगरपालिका ८ स्थित डेभिज स्नुकर क्लबमा सञ्चालन हुनेछन् । प्रतियोगिताबाट नयाँ प्रतिभाशाली खेलाडीहरु उत्पादन गरी जिल्ला र राष्ट्रमा विलियार्ड, स्नुकर खेलको रौनक बढाउने उद्देश्य राखिएको प्रतियोगिता संयोजक गुरुङले बताए ।