पोखरा ।
एमाले गण्डकी प्रदेश संगठन कमिटीले सबै शक्ति र सामथ्र्य केन्द्रित गरी आउँदो मंसिर ४ गते हुने प्रदेश तथा प्रतिनिधिसभाको निर्वाचनको तयारीमा जुट्ने निर्णय गरेको छ । तनहुँको बन्दीपुरमा भएको संगठनात्मक कार्यशालाले आगामी निर्वाचनको तयारीलाई केन्द्रविन्दुमा राखेर पार्टी जिल्ला, पालिका, वडा र टोल कमिटीका बैठक भदौ मसान्तसम्म राखी आम पार्टी पंक्ति परिचालनको प्रभावकारी योजना निर्माण गर्ने निर्णय गरेको एमाले गण्डकी प्रदेश कमिटी सचिव धनञ्जय दवाडीले जानकारी दिए ।

साउन २९ र ३० गते भएको कार्यशालाले भदौ मसान्तसम्म जनसंगठनका प्रदेश, जिल्ला, पालिका र आधारभूत तहसम्मका कमिटीको बैठक र भेला गरिसक्ने निर्णय भएको सचिव दवाडीले बताए । पार्टी सदस्यताको नवीकरणमा स्वंय पार्टी सदस्यलाई नै उत्प्रेरित गर्ने गरी उत्साहजनक तबरले परिचालित गर्ने र यो भदौ १५ गतेभित्र सम्पन्न गर्ने कार्यशालाले संकल्प गरेको छ ।

कार्यशालाले स्थानीय निर्वाचनको मुल सन्देश र शिक्षालाई दृढताका साथ पार्टी पंक्तिमा स्थापित गर्ने अठोट गरेको छ । प्रदेशमा संघ तथा प्रदेश तर्फका धेरै स्थानमा नेकपा (एमाले)लाई विजयी गराउन आम पार्टी पंक्तिलाई एक ढिक्का भएर निर्वाचनमा परिचालित गर्ने निर्णय गरेको गण्डकी प्रदेश सभाका सदस्य रहेका सचिव दवाडीले सुनाए । उनले वर्तमान सत्ता गठबन्धनको केन्द्रीय तथा प्रदेश सरकारले गरेका महंगी, भ्रष्ट्राचार, बेथीति जस्ता जनविरोधी र राष्ट्रियता विरोधी गतिविधिका बिरुद्ध संघर्षका कार्यक्रम जिल्ला र पालिका र वडा स्तरसम्म पुगी जनसंगठनको व्यापक सहभागितामा सञ्चालन गर्ने निर्णय गरेको बताए ।

कार्यशालामा नेता तथा कार्यकर्ताले पार्टीभित्र पछिल्लो समय हुर्केको अवसरवाद र संगठनात्मक अराजकतालाई परास्त गर्दै पार्टीलाई विधिसम्मत तबरले सञ्चालन गर्ने प्रतिवद्धता गरेका छन् । फरक फरक समूह निर्माण लगायतका गतिविधि रोक्दै पार्टीलाई विधि र प्रक्रियाबाट अघि बढाउने र हरेक नेता कार्यकर्ता अन्तरविरोधको समाधानकर्ता बन्ने र विविधतामा एकता खोज्ने पद्दति निर्माण गर्न एक ढिक्का भएर लाग्ने सामूहिक प्रतिवद्धता गरिएको सचिव दवाडीले उल्लेख गरे ।

कार्यशालामा पार्टीका उपमहासचिव पृथ्वीसुब्बा गुरुङ, स्थायी कमिटी सदस्यहरु किरण गुरुङ, भानुभक्त ढकाल र कर्ण थापाको उपस्थिति थियो । कार्यशालामा पार्टी सचिव एवं गण्डकी प्रदेश इन्चार्ज पद्मा अर्याल र स्थायी कमिटी सदस्य एवं संगठन विभाग प्रमुख खगराज अधिकारीले कार्यपत्र प्रस्तुत गरेका थिए ।