पोखरा ।
रामबजार पोखरास्थित एसओएस स्कुल गण्डकीमा कक्षा ११ का नवआगन्तुक विद्यार्थीहरूको स्वागत तथा अभिमुखीकरण कार्यक्रम सम्पन्न गरिएको छ । कार्यक्रमको प्रमुख आतिथ्यमा गण्डकी विश्वविद्यालयका कुलपति प्राडा गणेशमान गुरुङले थिए ।
विद्यालयका संयोजक खगेन्द्रराज बरालले मन्तव्यसहित कक्षा ११ का नवआगन्तुक विद्यार्थीहरूलाई खादा लगाएर स्वागत गरेका थिए । कक्षा ११ का नवआगन्तुक विद्यार्थीहरूको स्वागतमा कक्षा १२ का विद्यार्थीहरूले विभिन्न सांस्कृतिक कार्यक्रमहरूसमेत प्रस्तुत गरेका थिए ।

विद्यालयका सहप्राचार्य किरण सापकोटा, एसओएस बालग्राम गण्डकीका योजना निर्देशक प्रदीपभक्त आचार्यले समेत मन्तव्य राखेका थिए । सहप्राचार्य सापकोटाले आफ्नो भविष्यका सपना साकार पार्ने उद्देश्य लिएर एसओएस गण्डकीमा प्रवेश गरेका विद्यार्थीहरूलाई योजना साकार पार्ने अभियानमा प्रतिबद्ध भएर अगाडि बढ्न सुझाव दिए । विशेष अतिथिको आसनबाट बोल्दै एसओएस बालग्राम गण्डकीका योजना निर्देशक प्रदीपभक्त आचार्यले कक्षा ११ का नवआगन्तुक विद्यार्थीहरूले पालन गर्नुपर्ने आचारसंहिताका बारेमा जानकारी गराए ।

प्रमुख अतिथि कुलपति डा गुरुङले अनाथ र असहाय बालबालिकाहरूलाई संरक्षण र शिक्षादीक्षा प्रदान गर्दै एसओएस गण्डकीले शैक्षिक क्षेत्रमा पु¥याइरहेको योगदानको सराहना गरे । समारोहमा विद्यार्थीहरूद्वारा प्रस्तुत प्रतिभाको प्रशंसा गर्दै उनले एसओएसबाट दीक्षित भएर उच्च शिक्षातर्फ अग्रसर हुने विद्यार्थीहरूलाई गण्डकी विश्वविद्यालयमा अध्ययनका लागि छात्रवृत्ति उपलब्ध गराउने विषयप्रति आफू सकारात्मक रहेको बताए ।

कक्षा १२ मा अध्ययनरत छात्रा आयुष्मा भण्डारीद्वारा सञ्चालित कार्यक्रमको सभाध्यक्षता विद्यालयका निमित्त प्राचार्य चूडामणि सुवेदीले गरेका थिए । विज्ञान सङ्कायको अध्ययन–अध्यापन हुने एसओएस स्कुलको कक्षा ११ मा हाल भुक्तानी र छात्रवृत्ति कोटामा गरी एक सय तीसभन्दा बढी विद्यार्थीहरू अध्ययनरत छन् ।