लेखनाथ ।
लेखनाथ सामुदायिक बचत तथा ऋण सहकारीले स्थापना दिवसका अवसरमा आयोजना गरेको अन्तर मावि वक्तृत्व कला प्रतियोगितामा डायमन्ड मोडल बोर्डिङकी कृपा अधिकारी प्रथम भएकी छन् । सहकारीले साताव्यापी कार्यक्रमका साथ स्थापना दिवस मनाइरहेको छ ।

दिवसको अन्तिम दिन सहकारी संस्थाको समुदायमा महत्व र उपयोगिता शीर्षकमा भएको वक्तृत्वकला प्रतियोगितामा लक्ष्मी आदर्श माविका विपिन सुवेदीले दोस्रो, ज्ञानज्योति स्कुलकी खुसी गौतम तेस्रो र न्यु लाइट बोर्डिङ स्कुलकी युरिका सुवेदी सान्त्वना बने ।

विजयी विद्यार्थीलाई पोखरा २७ का वडाध्यक्ष पुर्णकुमार गुरुङले पुरस्कार वितरण गरे । उनले विषयवस्तुमा केन्द्रित भई खुला रुपले प्रतिभा प्रस्फुटन गर्दा विद्यार्थीको क्षमता बढ्ने बताए । सहकारीका उपाध्यक्ष हिमालय ओझाको अध्यक्षतामा भएको कार्यक्रममा नेपाल उद्योग बाणिज्य महासंघका केन्द्रीय सदस्य बाबुराम गिरी, कार्यक्रम संयोजक लक्ष्मी बास्तोला, संस्थाका सचिव कृष्णप्रसाद तिवारी लगायतले बोलेका थिए । निर्णायकमा अपिल कोइराला, पिताम्बर पौडेल र रवीन्द्रराज पौडेल थिए ।