पोखरा ।
मनिपाल कलेज अफ मेडिकल साइन्सेज तथा शिक्षण अस्पातलमा स्थापनाको २८ वर्षमा पहिलो पटक महिला कर्मचारीको सम्मानमा तीज कार्यक्रमको गरिएको छ । बतास अर्गनाइजेसन अन्तर्गतको बापौ होल्डिङ्सले व्यवस्थापन सम्हालेपछि शुक्रबार ऐतिहासिक तीज कार्यक्रम भएको हो ।

कार्यक्रममा तीज नृत्य तथा परम्परागत भेषभूषा प्रतियोगिता भएको थियो । अस्पताल तथा कलेजका विभिन्न विभागबाट सात समूहले भाग लिएका थिए । प्रतियोगितामा सर्जिकल वार्डका मनसूभा गुरुङ र निशिका थापाको समूह विजयी भएको थियो । एमेर्जेन्सी वार्डका अन्जु नेपाली, मीना विक, शीला खत्री, सीमा लामा, अर्पणा राजबमशी र निकिता श्रेष्ठको समूहले दोस्रो स्थान प्राप्त गरेको मनिपाल अस्पतालका वरिष्ठ पुस्तकालय सहायक खीम लामिछानेले जानकारी दिए ।

परम्परागत भेषभूषा प्रतियोगितामा प्राइभेट वार्डकी सेलिना मोक्तान विजयी र फार्मेसीकी सिता मगर उपविजेता भइन् । विजयीलाई मन्जु गोख्ले पुरस्कार वितरण गरेकी थिइन् । अस्पातलले पहिलो पटक तीज कार्यक्रम गरेकोमा सहभागिले खुशी व्यक्त गर्दै आयोजकप्रति कृतज्ञता प्रकट गरेको लामिछानेले बताए ।

कार्यक्रममा ४ सय महिला कर्मचारीको उपस्थिती थियो । बिष्णुमाया गुरुङ र सोनी ढेवाजुको समुहले स्वागत नृत्य प्रस्तुत गरेका थिए । प्रतियोगिताको सञ्चालन गंगा पोखरेल र सुनिता बरालले गरेका थिए ।