पोखरा ।
आउँदो मंसिर ४ मा हुने प्रदेश सभा, प्रतिनिधि सभा निर्वाचनमा उम्मेदवार छनोटका लागि नेपाली कांग्रेसले तयारी सुरु गरेको छ । कास्की निर्वाचन क्षेत्र नम्बर २ प्रदेश सभा निर्वाचन क्षेत्र नम्बर ‘ख’मा आकांक्षीहरुले पार्टी समितिमा नाम टिपाएका छन् ।

उक्त निर्वाचन क्षेत्रबाट उम्मेदवार बन्न प्रत्यक्षतर्फ ५ र समानुपातिकतर्फ १३ जना नाम टिपाएको नेपाली कांग्रेस प्रदेश सभा क्षेत्रीय कार्यसमिति (ख) का सभापति दीपेन्द्र मर्सानीले जानकारी दिए ।

सो क्षेत्रको प्रत्यक्षतर्फ नाम टिपाउनेमा गण्डकी प्रदेशसभाका २ मन्त्री पनि छन् । प्रदेश सरकारका वर्तमान भौतिक पूर्वाधार, सहरी विकास तथा यातायात मन्त्री कुमार खड्का र महासमिति सदस्य तथा गण्डकी प्रदेश सरकारका वर्तमान कानुन, सञ्चार तथा प्रदेश सभा मामिला मन्त्री विन्दुकुमार कुमार थापा छन् । माधवप्रसाद बास्तोला, मदन बस्नेत र होमबहादुर बानियाँले पनि प्रत्यक्षतर्फ चुनाव लड्ने आकांक्षा व्यक्त गर्दै नाम टिपाएका छन् ।

समानुपातिकतर्फ रामराज लामिछाने, नीलम बाटाजु, मञ्जुश्री थापा, राजेन्द्र पहारी, राधाकृष्ण गुरुङ, र अब्दुल मजीद मियाले आकांक्षा व्यक्त गरेका छन् । अर्पण कोइराला, उमाकुमारी ठकुरी, पदमसिंह गुरुङ, ऋषिराम सापकोटा, कल्पना बराल, लक्ष्मी पाण्डे र चोलेन्द्र पौडेलले पनि समानुपातिकतर्फ चुनाव लड्न आकांक्षा व्यक्त गरेका छन् ।

नेपाली कांग्रेस प्रदेश सभा निर्वाचन क्षेत्र समितिले आकांक्षीमध्ये प्रत्यक्षतर्फ एकजना महिलासहित ३ जनाको नाम पार्टी केन्द्रलाई सिफारिस गर्ने मर्सानीले बताए ।