पोखरा ।
अन्नपूर्ण गाउँपालिका कास्कीले वडा नं. ५ मा निस्सा वितरण गरेको छ । गण्डकी प्रदेशमै सबैभन्दा पहिला निस्सा वितरण सुरुवात गरेको अन्नपूर्ण गाउँपालिकाले सोमबार वडा नं ५ मा १९ भूमिहीन दलित र २ अव्यवस्थित बसोबासीलाई निस्सा वितरण गरेको छ ।

वडा नं ५ का वडाध्यक्ष जीवनाथ पौडेलको अध्यक्षतामा भएको कार्यक्रममा गाँउपालिकाका अध्यक्ष विष्णुबहादुर केसीले राम्रो कार्यक्रम सुरुआत भएको बताए । उनले कार्यकालको पहिलो वर्षमै सबै भूमिहीनलाई जग्गा उपलब्ध गराएर भूमिपति बनाइने जनाए । वडाले भूमिहीनलाई जग्गा सिफारिस गरेको केही दिनमै नापी टोली खडा गरी नापजाँच गर्ने प्रतिवद्धता पनि उनले गरे ।

राष्ट्रिय भूमि आयोग अन्नपूर्ण गाउँपालिका इकाइका फोकल पर्सन प्रभात पौडेलले गाउँपालिकाका सम्पूर्ण वडामा यही महिनाभित्र निस्सा वितरण गरिने बताए । जग्गा धनीपुर्जा वितरण गर्ने नेपालमै पहिलो स्थानीय तह बनाउने उनको भनाइ छ । पौडेलले गाउँपालिकाले भूमिहीनलाई आवास प्रयोजनका लागि ३ सय ४० वर्ग मिटर र कृषि प्रयोजनका लागि २ हजार वर्ग मिटर जमिन उपलब्ध गराउने उल्लेख गरे ।

वडा नं ५ का वडाध्यक्ष पौडेलले राष्ट्रिय भूमि आयोगको कार्यविधि अनुरुप वडाबाट गर्नुपर्ने सम्पूर्ण काम भइसकेको सुनाए । भूमिहीनलाई जग्गा खोजिसकेकाले छिट्टै जग्गा वितरण गरिने उनले जनाए ।