पोखरा ।
इन्टरपोलबाट रेड नोटिस जारी भएका एक नेपाली अभियुक्त पक्राउ परेका छन् । लमजुङ दोर्दी गाउँपालिका १ भर्तेका ३८ वर्षीय नारायण प्रसाद अधिकारीलाई मकाउबाट पक्राउ गरेर मंगलबार नेपाल ल्याइएको प्रहरी प्रवक्ता डीआईजी टेकप्रसाद राईले जानकारी दिए ।

मानव बेचबिखन तथा ओसारपसार मुद्दाका अभियुक्त अधिकारी मकाउमै लुकेका थिए । उनलाई अन्तर्राष्ट्रियस्तरमा खोजतलास गर्नको लागि नेपाल प्रहरी प्रधान कार्यालय मानव बेचबिखन ब्यूरोको अनुरोधमा इन्टरपोल महासचिवालयबाट रेड नोटिस जारी गरिएको थियो । खोजी गर्ने क्रममा इन्टरपोल मकाउको समन्वयमा मकाउमा पक्राउ परेका उनलाई त्रिभुवन अन्तर्राष्ट्रिय विमानस्थलमा ल्याइएको हो ।

अधिकारीले मासिक १ लाख ५० हजार रुपैयाँ तलब हुने गरी क्यानेडियन कम्पनीमा रोजगारी मिलाइदिने भनी पीडितहरूसँग २५र२५ सय डलर र पासपोर्ट लगेका थिए भने उनीहरूलाई नेपालबाट दुबईमा पुर्याएका थिए । दुबईबाट लिविया हुँदै इटाली लाने भनी फेरि पीडितहरूबाट ३ लाख रूपैयाँ आफ्नो श्रीमतीको बैंकको खातामा जम्मा गर्न लगाएका थिए ।

पीडितलाई लिवियाको शरणार्थी क्याम्पमा राखिएको अवस्थामा लिवियास्थित नेपाली सेनाको शान्ति सेना मिसन, ईजिप्टस्थित नेपाली राजदूतावास र आईओएमको समन्वयमा पीडितहरूलाई नेपाल फिर्ता ल्याइएको थियो । उनीहरुलाई ठगी गर्ने तथा बेचविखन गर्ने अधिकारीलाई आवश्यक कारबाहीका लागि नेपाल प्रहरी प्रधान कार्यालय मानव बेचबिखन ब्यूरोमा बुझाइएको डीआईजी राईले बताए ।