लेखनाथ ।
गार्डेन सिटी बि फार्मिङ पोखरा २६ ले किसानका लागि निःशुल्क तनि दिने मौरीपालन तालिम आयोजना गरेको छ ।
किसानलाई व्यवसायिक मौरीपालनतर्फ आकर्षण गर्ने उद्देश्यले मौरीपालनका विधि र उपयोगिताका प्रयोगात्मक विधिबारे तालिम दिइएको हो ।

मौरी पालेर पनि व्यावसायिक बन्न नसकेका किसानका लागि व्यवहारिक ज्ञान दिन तालिम भएको हो । कार्यक्रममा कृषि ज्ञान केन्द्र कास्की प्रमुख शालिकराम अधिकारीले मौरी जसरी मेहनती छ, त्यसैगरी किसानले पनि मौरी पालनका लागि आधारभूत ज्ञान लिएर काम गर्नुपर्ने बताए ।

गार्डेन सिटी बि फार्मिङका सञ्चालन टेकमान गुरुङको अध्यक्षतामा भएको कार्यक्रममा नेपाल मौरीपालन महासंघ कास्की अध्यक्ष श्रीभद्र बरालले कास्कीमा विशेष गरी सेरेना जातका मौरी पालनका लागि उपयुक्त हावपानी भएको बताए । थोरै लगानीमा नतिजा देखिने गरी व्यवसायिक मौरीपालन गर्न सकिने उनको भनाइ छ ।

कार्यक्रममा ३४ किसानको सहभागिता छ । उक्त अवसरमा प्रशिक्षक मिलन गुरुङ र कमल रानामगरले मौरीपालनको विधि र अपनाउनुपर्ने होसियारीबारे जानकारी दिए । कार्यक्रममा किसानको तर्फबाट बद्रिनाथ भण्डारीले पनि बोलेका थिए ।