जोमसोम ।
पछिल्लो समय जिसस मुस्ताङले जिल्लाको समग्र विकास योजना र कार्यक्रम कार्यान्वयनमा तदारुकता देखाउन थालेको छ । आइतबार जिसस मुस्ताङले जिल्लाको समग्र विकास योजनाको प्रगति र भावी कार्यक्रमबारे छलफल गरेको छ ।
छलफलमा संविधान सभा सदस्य चन्द्रबहादुर गुरुङ, सिडिओ नेत्रप्रसाद शर्मा, जिसस प्रमुख माया गुरुङ, उपप्रमुख आइतेलाल थकाली, पूर्व उपप्रमुख राजेन्द्र शेरचन लगायतले बोलेका थ्एि । बैठकमा जिल्लाका ५ वटै स्थानीय तह, संघीयतर्फ ११ वटा कार्यालय र प्रदेशतर्फ ९ वटा कार्यालयले गत आर्थिक वर्ष २०७८/०७९ को प्रगति विवरण र चालु आर्थिक वर्ष २०७९/०८० का कार्यक्रम र बजेट खाँका प्रस्तुत गरे ।

जिल्ला स्थित सरकारी कार्यालय र स्थानीय तहबीचको अन्तर सम्बन्धलाई सुदृढीकरण गर्दै जिल्लाका समस्या, चुनौती र समाधानको बाटो अवलम्बन गर्ने उद्देश्यले समन्वयात्मक बैठक आयोजना गरेको जिसस अधिकारी शिवकुमार पौडेलले बताए ।
गत वर्षको कुल बजेटमध्ये ५ अर्ब ३ करोड खर्च हुँदा जिल्लाको समग्र भौतिक प्रगति ८१ दशमलव ६७ प्रतिशत देखिएको छ । यस्तै, चालु वर्ष संघ, प्रदेश र स्थानीय तहलाई ६ अर्ब ११ करोड १८ लाख विनियोजन भएको छ । जसमध्ये चालुतर्फ ३ अर्ब १५ करोड र पुंजिगततर्फ २ अर्ब ९६ करोड छ ।

जिसस प्रमुख गुरुङले जिससलाई हेर्ने दृष्टिकोणमा परिवर्तन हुन जरुरी रहेको बताइन् । उनले जिसससँग कतिपय कार्यालयले समन्वय गर्न कन्जुस्याई गरेकोमा उल्लेख गरिन् । सिडिओ शर्माले जिल्लाको समग्र विकास योजनाको काममा स्थानीय प्रशासनले साथ दिने बताए ।