पोखरा ।
गण्डकी प्रदेशको शिक्षा, संस्कृति, विज्ञान प्रविधि तथा सामाजिक विकास मन्त्रालयले प्रदेश बाल परिषद्का पदाधिकारीका लागि क्षमता विकास तालिम गरेको छ । गण्डकी प्रदेश प्रशिक्षण प्रतिष्ठानसँगको सहकार्यमा आयोजित तालिममा मन्त्रालयका उपसचिव पुष्पराज पौडेल, प्रदेश बाल परिषद्का अधिकृत बद्रीप्रसाद वाग्ले र अधिवक्ता कुञ्जनी परियार प्यासीले सहजीकरण गरेका थिए ।

तालिममा बाल अधिकारसम्बन्धी कानुनी व्यवस्था, बालबालिका सम्बन्धी प्रादेशिक संरचना, प्रदेशको प्राथमिकतासँगै मन्त्रालयको भूमिका, प्रदेश बाल परिषद्को जिम्मेवारी, बालमैत्री स्थानीय शासनको अवधारणाको सूचकबारे प्रशिक्षण दिइएको उपसचिव पौडेलले बताए ।

कार्यक्रममा प्रदेश बाल अधिकार परिषद्का अधिकृत बद्रीप्रसाद वाग्लेले बालबालिका सम्बन्धी नियमावली आउने प्रक्रियामा रहेको बताए । कार्यक्रममा मन्त्रालयका महिला विकास निरीक्षक देवी शर्मा र शरद गुरुङ पौडेल, प्रदेश बाल अधिकार परिषद्का अध्यक्ष सुदीप पौडेल लगायतले बोलेका थिए ।