जोमसोम ।
भारतीय चर्चित आध्यात्मिक सद्गुरु (जग्गी वासुदेव)ले मुस्ताङको घरपझोङ–५ स्थित ढुम्बा तालको अवलोकन गरेका छन् । भारतसहित १० देशका ५१ जना शिष्यसहित मुस्ताङ आएका उनको टोलीले ढुम्बा तालको सोमबार दृष्यावलोकन गरेको श्रोतले जनाएको छ । सद्गुरुले शिष्यलाई ढुम्बातालको किनारमा योगाभ्यास तथा आध्यामिक प्रवचन दिएका छन् ।

ढुम्बातालको प्राकृतिक सौन्दर्यताले आनन्दित तुल्याएको आध्यात्मिक सद्गुरुले बताएका छन् । उनको टोलीले यारुझो भ्युटावर अवलोकन गरेका छन् । त्यहाँ उनीहरुले नाचगान गरी रमाईलो गरेका थिए । भ्यूटावर र ढुम्बातालको अवलोकनपछि सद्गुरुको टोली पून जोमसोम स्थित मोक्ष रिसोर्टमा फर्किएको थियो । पछिल्लो समय मुस्ताङको ढुम्बाताल प्रसिद्ध पर्यटकीय गन्तब्यको रुपमा विकास भइसकेको छ । ढुम्बातालमा स्वदेशी तथा विदेशी चलचित्रहरुको छायांकन भइसकेकाले मुस्ताङ आएका पर्यटक तालको अवलोकन गर्न छुटाउँदैनन ।

उनीहरु आज मंगलबार दिउँसो उपल्लो मुस्ताङको ढाक्मर जाने कार्यक्रम रहेको श्रोतले उल्लेख गरेको छ । भ्रमण टोलीमा भारतका २७, अमेरिकाका १२, नेदरल्याण्ड, चीन र क्यानडाका दुई, लेवनानका, मलेसियाका, रोमानिया, रसिया र नेपालका एकएक जना छन् ।

सद्गुरुको मुस्ताङ भ्रमण दोस्रो हो । २०७६ सालमा कैलास मानसरोवर जाने क्रममा मुस्ताङ पुगेका थिए । उनले गुरुसोङ्वो गुफामा ध्यान गरेका थिए । उनको मुस्ताङमा करिव १ हप्ता बस्ने कार्यक्रम रहेको बताइएको छ ।