जोमसोम ।
मुस्ताङको थासाङ–२ कोवाङमा आयोजित वडास्तरीय भलिबल प्रतियोगिताको उपाधि चितवनको मेघौली युवा क्लबले जितेको छ । धौलागिरी युवा क्लब कोवाङले आयोजना गरेको तेस्रो अन्तर जिल्ला वडास्तरीय भलिबल प्रतियोगिता अन्तर्गत शुक्रबार सम्पन्न फाइनल खेलमा आयोजक धौलागिरी युवा क्लब कोवाङलाई ३–१ को सेटमा हराउँदै मेघौलीले उपाधि जितेको हो ।

प्रतियोगिताको च्याम्पियन बनेको मेघौलीले नगद ६५ हजार रुपैयाँसहित मेडल, ट्रफी र प्रमाणपत्र हात पारेको छ । दोस्रो स्थान हात पारेको धौलागिरी युवा क्लबले ४० हजार रुपैयाँ नगद प्राप्त गरेको छ । १६ टिमको सहभागिता रहेको प्रतियोगितामा जिल्ला बाहिरका आधा दर्जन क्लबले भाग लिएका थिए । प्रतियोगिताको सर्वोत्कृष्ट खेलाडी धौलागिरी युवा क्लबका अजित गौचन घोषित भएका छन् । उनले नगद ३५ सयसहित मेडल, ट्रफी र प्रमाणपत्र पाए ।

प्रतियोगिताको समापनमा क्लबका संस्थापक अध्यक्ष स्वर्गीय भीम गौचन र क्लबको पूर्व खेलाडी रिजु गौचनलाई मरणोप्रान्त सम्मान गरेको छ । क्लबले प्रतियोगिता आयोजनाका लागि आर्थिक सहयोग गर्ने संघ, संस्था र व्यक्तिलाई प्रमाणपत्रले सम्मान गर्‍यो ।

‘स्वास्थ्यका लागि खेलकुद, राष्ट्रका लागि खेलकुद’ भन्ने नारा सहित घरेलु खेलकुदको विकास तथा खेलका माध्यमबाट पर्यटन प्रर्वद्धन गर्ने उद्देश्यले क्लबले बर्सेनि प्रतियोगिता सञ्चालन गर्ने गरेको क्लबका अध्यक्ष मनप्रसाद गौचनले बताए ।
क्लबका जापान शाखाका पूर्व अध्यक्ष अनिल भट्टचनले खेलकुदले खेलाडीहरुको वृद्धि विकासमा मात्र नभइ व्यक्तिगत स्वास्थ्यको समेत रक्षा गर्ने बताए ।

प्रतियोगिताका विजेता तथा उपविजेतालाई थासाङका मिर मुखिया ज्वाहार भट्टचन, क्लबका अध्यक्ष मनप्रसाद गौचन, पूर्व वडाध्यक्ष नरप्रसाद हिराचन, समाजसेवी मिनप्रसाद थकाली लगायतले पुरस्कार वितरण गरेका थिए ।