पोखरा ।
पोखरामा हिमालयन भीगन महोत्सव हुने भएको छ । असोज २ देखि ४ गतेसम्म पोखराको होटल ग्राण्डमा महोत्सव आयोजना गर्न लागिएको आयोजक वल्र्ड भीगन अर्गनाइजेसन नेपालले जनाएको छ । महोत्सव पोखरासहित काठमाडौं र लुम्बिनीमा समेत आयोजना गरिने छ । दक्षिण एसियामै पहिलो पटक भिगनिज्मबारे महोत्सव राखिएको आयोजकको दाबी छ ।

वल्र्ड भीगन अर्गनाइजेसन नेपालका अध्यक्ष विष्णुप्रसाद न्यौपानेले भीगन खाना र भीगन जीवनशैलीको प्रचारका लागि महोत्सव आयोजना गरिएको बताए । ‘भिगनिज्मको अवधारणालाई नेपालमा अपनाउन सके नेपाल भीगन व्यक्तिहरुको प्रमुख पर्यटकीय गन्तव्य बन्न सक्छ,’ उनले भने, ‘कार्यक्रमले पोखराको पर्यटनमा पनि सहयोग गर्छ, १५० बढी पर्यटक महोत्सवमा आउनुहुन्छ ।’

महोत्सवमा १ सय बढी अन्तर्राष्ट्रिय वक्ताहरुले बोल्ने बताइएको छ । महोत्सवमा ७५ बढी सूचनामूलक प्रदर्शनी, भीगन च्यालेन्ज, भीगन खाना बनाउने कार्यशाला, राष्ट्रिय अन्तर्राष्ट्रिय सेफद्वारा पाक शिक्षा प्रदर्शनी, चलचित्र प्रदर्शनी, जनावर अधिकार सम्बन्धी शिक्षा, भीगन लघु चलचित्र प्रतियोगिता समेत राखिने बताइएको छ ।

भिगनिज्मले विश्वमा बढ्दो तापक्रम रोक्न सहयोग गर्ने जीवनशैली भएको कार्यक्रमको प्रमुख अतिथी संस्थाका उपाध्यक्ष विष्णु न्यौपानेले बताए । कार्यक्रममा स्वागत मन्तव्य ऋषि सापकोटाले गरेका थिए भने गण्डकी बोर्डिङका शिक्षक लक्ष्मीनारायण ढकालले भिगनिज्मको बारेमा बोलेका थिए । कार्यक्रमको सञ्चालन उमेश पराजुलीले गरेका थिए ।