पोखरा ।
स्वतन्त्र उम्मेदवारी दिने अभियान्ताको समूह लौरो अभियानले चुनाव अघि नै उम्मेदवारी घोषणा गर्नेलाई लौरो हस्तान्तरण गर्ने भएको छ । भदौ २६ गते बसेको स्वतन्त्र तथा लौरो अभियानको बैठकले दशैं अघि नै प्रचारप्रसार तीव्र पार्ने निर्णय गरेको हो ।

अभियान संयोजक सुमन सायमीको अध्यक्षतामा बसेको केन्द्रीय बैठकले दशैं अघि नै सातै प्रदेशमा चुनावी प्रचारप्रसार तीव्र पार्ने निर्णय गरेको हो । वैकल्पिक शक्ति तथा स्वतन्त्र अभियानका सबै पक्षहरुसँग सहकार्यका लागि अभियान संयोजक सायमीको नेतृत्वमा वार्ता टोली गठन गरेर अघि बढ्ने अभियानका प्रवक्ता हरि कार्कीले जानकारी दिए ।

यस्तै ३१ भदौमा लुम्बिनी र १ असोजमा गण्डकी प्रदेशमा स्वतन्त्र उम्मेदवारलाई प्रारम्भिक रुपमा लौरो चुनाव चिह्न दिने निर्णय भएको कार्कीले बताए । गण्डकी प्रदेशका लागि संयोजक जीवन गुरुङलाई जिम्मेवारी दिइएको छ ।

प्रारम्भिक छनोटमा लौरो चुनाव चिन्हबाट उम्मेदवारी घोषणा गरेका अभियन्तालाई केही जिल्लामा विभिन्न प्रलोभन, डर दिइएकोमा अभियानको गम्भीर ध्यानाकर्षण भएको उनले बताए । यस्ता गतिविधि नगर्नका लागि उनले आग्रह गरेका छन् ।