पोखरा ।

पोखरा । मंसिर ४ गते हुने प्रतिनिधिसभा तथा प्रदेशसभा निर्वाचनका लागि नेकपा (माओवादी केन्द्र) ले कास्कीबाट सम्भावित उम्मेदवारको सूची पठाएको छ । प्रदेश सभा र प्रतिनिधिसभा निर्वाचिनमा प्रत्यक्ष र समानुपातिक गरेर ४५ जनाको नाम सिफारिस गरेको जिल्ला पार्टी कमिटीले जनाएको छ ।

प्रतिनिधिसभाका लागि राजकाजी गुरुङ ‘करण’, योशादा सुवेदी गुरुङ, तेजकुमारी पौडेल र शिवजी लामिछानेको नाम सिफारिस भएको छ । करण यसअघि क्षेत्र नम्बर २ बाट प्रदेशसभा प्रतिस्पर्धा गरेका थिए । उनी कांग्रेसका विन्दुकुमारी थापासँग पराजित भएका थिए । प्रदेश सभा क्षेत्रनम्बर १ क मा सांसद दीपक कोइराला, विश्वप्रकाश लामिछाने, विमला पहारी, छवि लामिछाने र अमरदीप पराजुलीले नाम सिफारिस भएको छ । १(ख) मा गायत्री गुरुङ, शरदचन्द्र बराल, तोरण गुरुङ र सूर्यप्रकाश तिवारीको नाम सिफारिस भएको हो । दीपक कोइराला र गायत्री हाल गण्डकी प्रदेशसभा सदस्य हुन् ।
क्षेत्र नम्बर २ मा सुमन देवकोटा र गंगा पोखरेलको नाममात्रै भएको छ । पोखरेल भूमि आयोगको कास्की अध्यक्ष हुन् ।
प्रदेशसभा २ (क) मा जनकराज पराजुली र भक्तबहादुर खत्री सिफारिस भएका छन् । त्यस्तै २ (ख) मा विनय थापा, हरिनारायण गिरी, रुद्र विश्वकर्मा र रामजी आचार्यको नाम सिफारिस भएको छ ।

क्षेत्र नम्बर ३ बाट प्रतिनिधिसभामा रामजीप्रसाद बराल, दुर्गाकुमारी विक, नवराज भण्डारी र बलराम सुवेदीको नाम सिफारिस भएको छ । बराल हाल गण्डकी प्रदेशसभाको सांसद तथा अर्थमन्त्रीको भूमिकामा छन् ।
प्रदेशसभा ३ (क) बाट आशमान रोका, सिर्जना त्रिपाठी, भोजराज पौडेल, टंकप्रसाद अधिकारी र तीर्थ लुइँटेलको नाम भएको छ । त्यस्तै ३ (ख) बाट अग्नि कँडेल, दुर्गादत्त भण्डारी, त्रिभुवन पौडेल, हरिप्रसाद भण्डारी र गोविन्द्र अधिकारीलाई सिफारिस गरिएको हो ।

प्रतिनिधिसभाको समानुपातिक तर्फ सोमति गुरुङ, बखानसिंह तमु, राजकुमारी दुलाल, जुवेदा खातुन र अनिता भूर्तेल तथा प्रदेशमा अलिसा आले, जगमाया सुनार, गोमा ढकाल, विश्वेश्वर आचार्य र सन्तबहादुर भुजेलको नाम सिफारिस भएको छ ।