लेखनाथ ।
पोखरा उद्योग वाणिज्य संघको नवनिर्वाचित टोलीलाई मंगलबार लेखनाथ उद्योग वाणिज्य संघले स्वागत तथा सम्मान गरेको छ ।
पोखरा उद्योग वाणिज्य संघको हालै सम्पन्न ३४ औं महाधिवेशनवाट निर्वाचित अध्यक्ष पवनकुमार प्रजापति सहित सम्पूर्ण पदाधिकारीलाई सम्मान गरिएको हो ।

कार्यक्रममा बोल्दै पोखरा उद्योग वाणिज्य संघका अध्यक्ष प्रजापतिले कास्कीमा रहेका दुई उद्योग वाणिज्य संघ आपसमा मिलेर व्यवसायीहरुको हक हित र प्रवद्र्धनका लागि साझा एजेण्डा बनाएर बढ्नुपर्ने बताए । पोखरामा अन्तर्राष्ट्रिय विमानस्थल सञ्चालनमा आएपछि लेखनाथ क्षेत्रमा शिक्षा, स्वास्थ्य, कृषि र पर्यटनको क्षेत्रमा अझै सम्भावनाका ढोकाहरु खुल्ने र यसका लागि आवश्यक पूर्वाधार निर्माणमा पहल र प्रयास आवश्यक रहेकोमा जोड दिए ।

कार्यक्रममा लेखनाथ उद्योग वाणिज्य संघका अध्यक्ष छत्रधर आत्रेयले दुई संघबीचे भातृत्व र भाइचाराको सम्बन्धलाई अझ एकताबद्ध बनाएर बढ्नुपर्ने बताए । संघका अध्यक्ष आत्रेयको अध्यक्षतामा सम्पन्न कार्यक्रमको सञ्चालन महासचिव उपेन्द्रराज सुवेदी (राजु) र धन्यवाद ज्ञापन वरिष्ठ उपाध्यक्ष विनोद श्रेष्ठले गरेका थिए ।