जोमसोम ।
जिल्ला समन्वय समिति मुस्ताङको छैटौं जिल्ला सभा मंगलबार सकिएको छ । जिल्ला समन्वय मुस्ताङले ५ स्थानीय तह र जिल्लाका सरोकारवाला निकायको उपस्थितीमा जिल्ला सभा आयोजना गरेको हो । संघीय प्रतिनिधिसभा सदस्य प्रेमप्रसाद तुलाचनले दीपप्रज्वलन गरी सभाको उद्घाटन गरे ।

तीन तहको सरकारले गर्ने कार्यसम्पादनमा जिल्ला समन्वय समितिले प्रभावकारी भूमिका निर्वाह गर्नुपर्ने तुलाचनले बताए । तुलाचनले आफू दुर्गम जिल्लाको जनप्रतिनिधि भएपनि विकासको मोडालिटी आफूबाट सिक्न अन्य संघीय सांसदहरुलाई अनुरोध गरे । संघीयताको पहिलो कार्यकाल सकिँदै गर्दा संघ तथा प्रदेश सरकारबाट अर्बौं रुपैयाँ बजेटको विकास काम भएको बताए ।

स्थानीय तहलाई अनुरोध गर्दै सांसद तुलाचनले भने, ‘पालिकाहरुले अब जनताको जीवनस्तर सुधार्ने काम गर्नुहोला, कृषि र पर्यटनको समस्या केलाउनु होला ।’ सांसद तुलाचनले ठूला योजना संघ र प्रदेशबाट ल्याउन पहल गर्ने बताए । मुस्ताङलाई सडकमार्गबाट उत्तर÷दक्षिण राजमार्ग र मुस्ताङ–डोल्पा जोड्ने काम छिटो सक्न बताए ।

सभामा गण्डकी प्रदेशका सांसद महेन्द्रबहादुर थकाली, संविधानसभा सदस्य चन्द्रबहादुर गुरुङ, श्रीमाया थकाली, जिसस प्रमुख माया गुरुङ, पूर्व जिसस प्रमुख छिरिङ ल्हामो गुरुङ, घरपझोङ गाउँपालिकाका अध्यक्ष मोहनसिंह लालचन र प्रमुख जिल्ला अधिकारी नेत्रप्रसाद शर्मा लगायतले बोलेका थिए ।

समन्वय समितिको बन्द सत्रले जिल्लाका विविध विषयमा साझा अवधारणापत्र तयार पारेको जिसस अधिकारी शिवकुमार पौडेलले बताए । जिसस प्रमुख माया गुरुङको अध्यक्षतामा बसेको बन्द सत्रले मुस्ताङमा कालीगण्डकी नदीमा वर्षेनी ढुंगा , गिट्टी, बालुवा र ग्रेगान जम्मा हुँदा तटीय क्षेत्रका बस्ती जोखिममा परेको निस्कर्ष निकालेको छ ।

नदी नियन्त्रणका लागि नदीजन्य पदार्थको समुचित संकलन तथा व्यवस्थापन गर्न पहल गर्ने, कृषि, पशुपालन र पर्यटन विकास तथा प्रर्वद्धनका लागि आवश्यक योजना तर्जुमा गर्ने, मुस्ताङको कुल क्षेत्रफलको १०.४९ प्रतिशत मात्र नापी भएको र बाँकी भोगचलन गर्दै आइरहेका नापी नभएका जग्गाको नापी गर्न संघ सरकारसँग अनुरोध गर्ने र जलवायु परिवर्तनका कारण कृषि, पशुपालन, पर्यावरणमा नकारात्मक प्रभाव परेको र त्यसको विकल्पका लागि वैज्ञानिक मार्ग खोज्दै उपायहरु अवलम्वन गर्ने र परम्परागत पुरानो घरको सांस्कृतिक सौन्दर्यता जोगाउन विकल्पहरु खोज्ने लगायतका साझा अवधारणा अनुमोदन भएको समन्वय अधिकारी पौडेलले बताए ।