पोखरा ।
सत्ता गठबन्धनमा जारी भागबन्डाको घनिभूत छलफल केही दिन मत्थर हुने भएको छ । २ र ३ असोजमा समानुपातिकतर्फका उम्मेदवारको बन्दसूची बुझाउनुपर्ने भएकाले दलहरु त्यसतर्फ केन्द्रित भएका छन् ।

बुधबारसम्म संघतर्फका १ सय १० भन्दा बढी निर्वाचन क्षेत्रको सिट बाँडफाँटमा सहमति भइसकेको छ । गठबन्धनमा आवद्ध दलका नेताहरुका अनुसार दलहरुले लिने कुल सिट संख्यामा भने कुरा मिलेको छैन । सत्ता गठबन्धनमा संघतर्फ अधिकांश सिट बाँडफाँटमा सहभागी भएको छ । प्रदेश राजधानी रहेको कास्कीका ३ क्षेत्रमा सत्ता गठबन्धनका तीन दलबीच कुरा मिल्न बाँकी छ । कांग्रेसले कास्कीको तीन वटै क्षेत्र आफूले पाउनुपर्ने दाबी गरेको छ । क्षेत्र नम्बर १ कांग्रेसले पाउने पक्काजस्तै भएको छ । कास्की २ मा एकीकृत समाजवादी र ३ मा माओवादी केन्द्रले पनि दाबेदारी गरेका छन् ।

कास्कीमा कांग्रेस, माओवादी र एकीकृत समाजवादीले एक–एक क्षेत्र लिने गरी सहमति हुने सम्भावना रहेको कार्यदलका एक सदस्य बताउँछन् । अघिल्लो निर्वाचनमा कास्कीका सबै संघीय क्षेत्रमा एमाले उम्मेदवार विजयी भएका थिए । त्यस बेला माओवादी–एमाले गठबन्धन हुँदा प्रदेशतर्फ ३ दिन माओवादीले पाएको थियो ।

मुस्ताङ, मनाङ, म्याग्दी र पर्वत कांग्रेसले पाउने भएको छ भने लमजुङ माओवादी केन्द्रले पाउने पक्का भएको छ । त्यहाँबाट माओवादी महासचिव देव गुरुङ उम्मेदवार हुने छन् । तनहुँ र स्याङ्जाका दुबै क्षेत्रबाट कांग्रेसका उम्मेदवार उठ्ने छन् ।
बागलुङ क्षेत्र नं. १ सत्ता गठबन्धनको अर्काे घटक राष्ट्रिय जनमोर्चाले पाउनेछ । क्षेत्र नं. २ भने माओवादीले लिने भएको छ । स्थानीय निर्वाचन ९ स्थानीय तह जितेको माओवादीले गोरखाका दुवै क्षेत्र दाबी गरेको छ । यहाँ कांग्रेसले एउटा क्षेत्र आफूले पाउनुपर्ने जिकिर गरेको छ भने माओवादी केन्द्रकै चुनाव चिन्हबाट उम्मेदवारी दिने सहमति गरेका नेसपा अध्यक्ष डा बाबुराम भट्टराई क्षेत्र नं. २ बाट चुनाव लड्न चाहन्छन् । नवलपरासी पूर्वको क्षेत्र नं. १ मा विवाद छैन । यहाँ कांग्रेसको मात्र दाबी छ भने २ मा कांग्रेससँग एकीकृत समाजवादी र माओवादी केन्द्रले दाबी गरेका छन् ।

बुधबारसम्म भएको सहमति हेर्दा कांग्रेसको भागमा करिब ७० सिट परिसकेको छ । माओवादीलाई २६, एकीकृत समाजवादीलाई ७ र जसपालाई ९ सिट दिन सहमति भइसकेको छ । अघिल्लो पटक बाम गठबन्धनमा आवद्ध भई १ सिट पाएको जनमोर्चाले यसपालि २ सिट पाउने करिब पक्का भएको छ ।

सिट बाँडफाँटमा सबभन्दा किचलो प्रदेश २ का मा देखिएको छ । कतिपय क्षेत्रमा तीन दलकै दाबी छ । रौतहटको क्षेत्र नम्बर १ एकीकृत समाजवादीका अध्यक्ष माधवकुमार नेपाललाई छाड्न सबै दल सहमत छन् । बाग्मती प्रदेशका धेरै जिल्लामा गठबन्धनबीच सहमति भएको छ । चितवन क्षेत्र नम्बर ३ माओवादी केन्द्रका अध्यक्ष पुष्पकमल दाहाल प्रचण्डलाई छाड्न सबै दल एकमत देखिएका छन् । अघिललो पटक प्युठानमा जितेकी राष्ट्रिय जनमोर्चाकी उपाध्यक्ष दुर्गा पौडेललाई सोही क्षेत्र छाड्न गठबन्धनमा दल एकमत छन् ।

कर्णाली प्रदेशका अधिकांश सिट बाँडफाँट भएका छन् । डडेलधुरामा प्रधानमन्त्री एवं कांग्रेस सभापति शेरबहादुर देउवालाई समर्थन गर्न सबै दल सहमत छन् । कैलालीको क्षेत्र नम्बर ५ प्रधानमन्त्री पत्नी आरजु देउवालाई दिने सहमति बनेको छ ।
अधिकांश सिट बाँडफाँटमा सहमति भए पनि कुल सिटमा भने दलहरुबीच कुरा मिल्न बाँकी देखिएको छ ।

कांग्रेस ९०, माओवादी ५०, एकीकृत समाजवादी र जनता समाजवादीले २०÷२० सिटमा दाबेदारी गरेका छन् । सबै दल गठबन्धनलाई निरन्तरता दिन सहमत रहेको र विवाद १५÷२० सिटमा मात्र रहेको स्रोतले जनाएको छ । समानुपातिक सूचीका उम्मेदवारको नाम टुंग्याउनुपर्ने भएकाले विवादित क्षेत्रको भागबन्डाको टुंगो असोज ३ गतेपछि मात्र लाग्दे देखिएको छ ।