पोखरा ।
बाल दिवसको उपलक्ष्यमा ड्याम साइड क्लब पोखरा १७ को आयोजनामा बुधबार भएको अन्तर विद्यालय खुला चित्रकला प्रतियोगितामा बेसलाइन एकेडेमीकी सोफिया रसाइली प्रथम भएकी छन् । दोस्रो पुरस्कार सोसियल पब्लिक स्कुलका सौरभ लोर्गनले पाए । न्यु मोडल सेकेन्डेरी स्कुलकी सजितु थापा तेस्रो र पार्दी माध्यमिक विद्यालयकी मनिषा गुरुङ र हिमाञ्चल बोर्डिङका दिप्सन केसी सान्त्वना बने ।

कार्यक्रममा कवि लक्ष्मण थापाले बाल दिवसको उपलक्ष्यमा क्लबले चित्रकला प्रतियोगिता आयोजना गर्नु निकै सान्दर्भिक र अनुकरणीय कार्य भएको बताए । कार्यक्रम संयोजक तथा क्लबका वरिष्ठ उपाध्यक्ष रमेशप्रसाद बरालले बालबालिकाको चित्रकारिता तथा प्रतिस्पर्धात्मक क्षमता अभिवृद्धिका लागि क्लबले प्रतियोगिता आयोजना गरेको बताए ।

विजेतालाई कवि लक्ष्मण थापा, क्लब अध्यक्ष प्रताप गुरुङ, निर्णयकहरु चित्रकार ढाका भट्टराई र झविन्द्र गुरुङले पुरस्कार तथा प्रमाणपत्र प्रदान गरेका छन् । प्रतियोगितामा कास्कीका १५ सरकारी तथा निजी विद्यालयका २३ विद्यार्थीको सहभागिता थियो । कार्यक्रम क्लबका अध्यक्ष प्रताप गुरुङको अध्यक्षतामा भएको थियो ।