पोखरा ।
पोखरा महानगरपालिकाका सबै वडामा भूमिहीन दलित र भूमिहीन सुकुम्बासीलाई निस्सा वितरण थालिएको छ । पोखरा महानगरपालिका र राष्ट्रिय भूमि आयोग कास्कीको संयुक्त आयोजनामा बुधबार एक कार्यक्रमका बीच महानगरका १६ वटा वडाका १ सय ९९ जना भूमिहीन दलित र भूमिहीन सुकुम्बासीलाई निस्सा वितरण गरियो ।

मेयर धनराज आचार्य, उपमेयर मञ्जुदेवी गुरुङ र राष्ट्रिय भूमि आयोग कास्की अध्यक्ष गंगा पोख्रेल नेतृत्वले निस्सा वितरण गरेका हुन् । मेयर आचार्यले भूमिहीन दलित, भूमिहीन सुकुम्बासी तथा अव्यवस्थित बसोबासीले प्राप्त गरेको निस्सा लालपुर्जा पाउनु अगाडिको लालपुर्जा नै भएको बताए । ‘यो सरकारी छाप लगाएको लालपुर्जा पाउनु अगाडिको लालपुर्जा नै हो,’ उनले भने, ‘यो कागज नपाउनेले लालपुर्जा पाउदैनन् । लालपुर्जा पाउनका निस्सा महत्वपूर्ण छ ।’ उनले यसलाई लालपुर्जा जत्तिकै महत्वका साथ लिन अनुरोध गरे ।

पोखरा सभागृहमा भएको कार्यक्रममा वडा नम्बर १, ३, ७, ८, १०, ११, १६, १८, १९, २२, २३, २४, २८, २९ र ३१ का प्रतिनिधिमूलक रूपमा १ सय ९९ जना भूमिहीन दलित र भूमिहीन सुकुम्बासीलाई निस्सा वितरण गरिएको हो । यसअघि महानगरका ६, ९, १४, २५, ३२ र ३३ मा निस्सा वितरण गरिसकिएको छ ।

पोखरा महानगरपालिकामा १९ हजार ८ सय ५६ भूमिहीन दलित, भूमिहीन सुकुम्बासी र अव्यवस्थित बसोबासी सूचीकृत छन् । उनीहरूमध्ये ७ हजार बढी निस्सा वितरणका लागि राष्ट्रिय भूमि आयोगको केन्द्रीय सर्भरमा सूचीकरण भइसकेका छन् । बाँकी सूचीकरणको क्रममा छन् ।