पोखरा ।
पछिल्लो समय मुलुकका मुख्य सहरमा लामखुट्टेको टोकाइबाट सर्ने डेंगु रोग तीव्र गतिमा फैलिइरहेको छ । पोखरा महानगरपालिकामा पनि १ सयभन्दा बढी डेंगुका बिरामी फेला परेका छन् । डेंगु रोकथामका लागि महानगरपालिकाले सचेतना अभियान सुरु गरेको छ ।

महानगरको स्वास्थ्य महाशाखाको नेतृत्वमा डेंगु रोग रोकथामका लागि लामखुट्टेको वासस्थान खोजी तथा नष्ट गर्ने अभियान सुरु भएको हो । महानगर मेयर धनराज आचार्यले डेंगु नियन्त्रणका लागि नागरिक सचेतना आवश्यक रहेको बताए । ‘डेंगुको थप उपचारभन्दा पनि यसलाई फैलन नदिनका लागि प्रमुख उपाय भनेको जनजागरण नै हो,’ उनले भने, ‘लामखुट्टेको टोकाइबाट सर्ने भएकाले त्यसको बासस्थान खोज्ने र नष्ट गर्ने नै हो ।’ लामखुट्टेको सम्भावित वासस्थानको पहिचान गरी नष्ट गर्ने अभियानमा साथ दिन मेयर आचार्यले सरोकारवालालाई आग्रहसमेत गरे ।

ग्यारेज तथा कवाडी संकलन केन्द्रहरूमा रहेका पुराना टायर लामखुट्टेको सुरक्षित बासस्थानका रूपमा पाइएकाले त्यस प्रकृतिका व्यवसाय सञ्चालन गरिरहेका व्यवसायीलाई थप सजगता अपनाउन उनले आग्रह गरे । यसअघि महानगरले कवाडी संकलन केन्द्रबाट डेंगु फैलन मद्दत पुगेको भन्दै कवाडी संकलनमा आवद्ध व्यवसायीलाई केन्द्र बजार क्षेत्रबाट बाहिर सर्न आग्रह गरेको छ । महानगरले शुक्रबार ३५ दिने सूचना जारी गर्दै केन्द्रलाई मुख्य बजार क्षेत्रबाट ५ सय मिटर बाहिर सर्न भनेको हो ।

स्वास्थ्य महाशाखाका प्रमुख कृष्णप्रसाद अर्यालले डेंगुको प्रकोप रोक्नका लागि सरोकारवालाको एकीकृत प्रयासमा जोड दिए । ‘डेंगु रोग पोखरा महानगरपालिकामा मात्र नभई राष्ट्रिय समस्याका रूपमा देखिएकाले यसको नियन्त्रणका लागि एकीकृत प्रयास आवश्यक छ,’ उनले भने ।

डेंगु एक प्रकारको ज्वरो हो । यो लामखुट्टेको टोकाइबाट सर्ने संक्रामक रोग हो । डेंगुको भाइरसद्वारा संक्रमित भएको एडिस एजिप्टाई जातको पोथी लामखुट्टेले यो रोग सार्दछ । यो रोग सार्ने लामखुट्टे ग्रामीण क्षेत्रभन्दा सहरी क्षेत्रमा बढी पाइन्छ ।