मान्छेले कुनै पनि विषयमा खराब चरित्र देखाउन हुदैँन नै । राष्ट्रको जिम्मेवार तहमा पुगेका व्यक्तिले त झनै नक्कली चरित्र प्रदर्शन गर्नु हुँदैन । नक्कली चरित्र देखाउन थाले एकदिन अवश्य भण्डाफोर हुन्छ, व्यक्तिको चरित्रमात्र उदांगिदैन, समाजको सन्तुलन, स्थिरतामाथि नै प्रहार हुन्छ । यो उदाहरण पूर्व प्रधानमन्त्री तथा नेकपा एमालेका अध्यक्ष केपी शर्मा ओलीमा लागु हुन्छ ।

ओलीको खराब चरित्र नागरिकता विधेयकले झल्काउँछ । आफू शक्तिमा हुँदा त्यही विधेयकलाई अध्यादेशमार्फत ल्याउने ओली नै अहिले विधेयकको विरोधमा छन् । लोकप्रियताको लागि उनले अध्यादेश ल्याउँदा सही हुने, अहिले त्यही विधेयकलाई संसदमा बहस पछि पठाउँदा गलत हुने ? खासमा ओलीले अध्यादेशमार्फत विधेयक ल्याउनु राजनीतिक खेलको हतियार थियो ।

ओलीले सत्ता बाहिर रहेर पनि राष्ट्रहित विरुद्ध भुमिका खेलिरहेका छन् भन्दा कसैलाई अनौठो लाग्यो भने एमसिसि पारित भएको घटनालाई हेरे विस्वास हुन सक्ला

Advertisement

ओलीले तराईमा गुमेको लोकप्रियतालाई जोगाउन÷बढाउन संसद विघटनको छेकोमा अध्यादेश ल्याएका थिए । तर अहिले त्इही विधेयकमा भने ओली र उनका पार्टीका नेता कार्यकर्ताको चर्को आलोचना सुन्न पाइन्छ । यो गलत चरित्र हो, नक्कली राष्ट्रवाद हो ।

नक्कली राष्ट्रवाद केही बेर चर्को होला, तर प्रभावको दृष्टिकोणले छोटो समयमात्र रहन्छ । नक्कली राष्ट्रवाद निहित स्वार्थको उपजमात्र हो, स्वार्थ परिपूर्ती गर्ने माध्यम हो । यसको अवलम्बन गर्नु उचित होइन । नागरिकता विधेयक गलत नै हो भने ओलीले एकपटक गम्भीर आत्मालोचना गर्न सक्नुपर्छ, होइन भने यसको विरोध आफूले पनि गर्नुहुँदैन र पार्टीका कार्यकर्तालाई पनि गर्न लगाउनु हुँदैन । आफैंले अध्यादेशमार्फत ल्याउन चाहेको विधेयक अहिले एकाएक कसरी गलत भयो ? जनतालाई बुझाउन सक्नुपर्छ, जनतालाई उत्तर दिनुपर्छ ।

तर ओलीले आत्मालोचना गर्दैनन् । उल्टै आफ्ना कामले राष्ट्रपति संस्थामाथि नै प्रश्न उठ्ने वातावरण बनाएका छन् । राष्ट्रपतिलाई ओलीले असंख्य पटक विवादमा तानेका छन्, संस्थाको गरिमा घटाएका छन् । ओलीको राजनीति नै देशमा भाँडभैलो गरेर आफू सत्तामा पुग्नु हो । भद्रगोल गरेर गोल गर्नु नै उनको राजनीतिको शैली हो ।

ओली प्रमुख प्रतिपक्ष दलका नेता हुन् । पार्टीमा उनी बाहेक अरु नेता नभएकै होइनन् । ओलीकै दाबी अनुसार सबैभन्दा ठूलो संगठन भएको पार्टी नै उनको एमाले हो । तर पार्टीले गर्ने कुनै पनि निर्णयलाई उनले सामूहिक मान्दैनन्, आफू स्वयंको मात्र मान्छन् । ओलीको मपाइत्वले दिनहुँ एमाले नेताहरुलाई गिज्जाइरहन्छ । एक व्यक्तिले मात्र सम्पूर्ण श्रेय लिन खोज्नु नै गलत छ । एकले मात्र परिवर्तन हुने भए यत्रा संगठनको औचित्य के हो ?

देशको चुच्चे नक्सा प्रकाशनका बेला ओली एकदिन भर संसदमा सम्बोधन गरे । उनको दाबी थियो कि उनले नक्सा पास मात्र गर्ने छैनन्, भूमि नै फिर्ता ल्याउने छन् । तर उनको कामको शैली भने ठीक उल्टो भयो । भारतका गुप्तचर प्रमुख सामन्तकुमार गोयलसँग बालुवाटारमै उनले गोप्य वार्तालाप गरे । मध्यरातमा भएको वार्ताको आवश्यकता के थियो ? छलफलमा उठेका विषय के थिए ? जनताले थाहा पाउने गरी सार्वजनिक हुने कहिले ? ‘राष्ट्रवादी’ नेताले मध्यरात विदेशी गुप्तचर निकायसँग गरेको छलफलबारे पढ्ने, हामी जनताले सुन्ने कहिले ?

एमसिसि र एसपिपि जस्ता राष्ट्रघाती परियोजनामा केपी ओली र राजेन्द्र क्षेत्रीलाई मुद्दा चलाइए के हुन्छ ? ओलीले सत्ता बाहिर रहेर पनि राष्ट्रहित विरुद्ध भुमिका खेलिरहेका छन् भन्दा कसैलाई अनौठो लाग्यो भने एमसिसि पारित भएको घटनालाई हेरे विस्वास हुन सक्ला । केपीले देखाएको नक्कली राष्ट्रवाद र राष्ट्रहित विपरित सत्ता बाहिर बसेर पनि उनले खेलेको भुमिकाबारे इतिहास साक्षी छ ।