पोखरा ।
नेपाल संघीयतामा गएपछि पहिलो पटक बनेको प्रदेश सभाको कार्यकाल सकिएको छ । पहिलो आम निर्वाचनबाट चुनिएका सांसदहरुको कार्यकाल असोज १ गते सकिएको हो । २०७४ को प्रदेशसभा निर्वाचनमा गण्डकी प्रदेशमा ६० सदस्य निर्वाचित भएका थिए ।

सांसदलाई असोज १४ गते बिदाइ गर्ने तयारी भएको छ । कार्यव्यवस्था परामर्श समितिको बैठकले असोज १४ गते शुभकामना आदानप्रदान भनी निवर्तमान सांसदलाई बोलाउने र भेटघाट र कदर पत्र प्रदान गर्ने कार्यक्रम तय छ ।

‘माननीयहरूको कार्यकाल ५ वर्षको हो, संविधानमा बिदाइ भन्ने शब्द छैन । हामीले कदरपत्र दिनेछौँ,’ प्रदेश सभाका सभामुख नेत्रनाथ अधिकारीले भने । ५ वर्षमा सांसदको भूमिकाको विषयमा सचिवालयले कदरपत्र दिने तयारी गरेको छ ।

अहिले गण्डकीमा ५८ जना सांसद छन् । कास्की २ ‘क’ बाट निर्वाचित भएका कृष्णबहादुर थापाले राजीनामा दिएका थिए भने बागलुङ १ ‘क’ बाट निर्वाचित कृष्ण थापालाई पार्टीले कारवाही गरेको थियो ।