पोखरा ।
पोखरा महानगरपालिकाले बजार अनुगमनलाई निरन्तरता दिएको छ । महानगरपालिकाको उपभोक्ता हित संरक्षण समितिले एक सातादेखि बजार अनुगमन गरिरहेको छ । पोखराका मुख्य बजारका पसलमा अनुगमन गरिएको हो ।

बुधबार पोखरा २६ र २७ का ५ खाद्य पसलमा अनुगमन भएको छ । अनुगमनमा मूल्यसूची नभएको, पसल दर्ता र दर्ता भएका पसल नवीकरण नभएका तथा म्याद नाघे खाद्य सामग्री र नापतौल दर्ता र नवीकरण नभएको फेला परेको महानगर उपभोक्ता हित संरक्षण समितिका सदस्यसचिव भरतराज पौडेलले जानकारी दिए ।

६ पसलका सञ्चालनलाई सम्पूर्ण कागजपत्रसहित महानगरपालिका, नापतौल तथा गुणस्तर कार्यालय ३ दिनभित्र उपस्थित हुन निर्देशन दिइएको पौडेलले बताए । पोखरा २६ का वडाध्यक्ष नरेन्द्र थापाले पसल सञ्चालन गर्दा दर्ता गरी बैधानिक रुपमा चलाउन अनुरोध गरे ।