हिमालपारीका सुरक्षाकर्मीले भित्र्याए फुलपाती

समाधान संवाददाता २०७९ असोज १६ गते १९:२१

वडा दशैं अन्तर्गत घटस्थापनाको आज आईतबार सातौं दिन । यस अवसरमा नेपालीहरको घरघरमा स्थापना गरिएको देवी समक्ष अर्पण गर्न फुलपाती भित्र्याईने प्रचलन छ । हिमालपारीको जिल्ला मुस्ताङका सुरक्षाकर्मीले आईतबार फुलपाती भित्र्याएका छन् ।

नेपाली सेना, सशस्त्र प्रहरी, र नेपाल प्रहरीले मुस्ताङ सदरमुकाम स्थित आ–आफ्नो व्यारेकमा रहेका जमरा घरमा फुलपाती भित्र्याएका छन् ।मुस्ताङको जोमसोम स्थित नारायण दल गण, सशस्त्र प्रहरी बल ३३ नं. गुल्म र जिल्ला प्रहरी कार्यालय मुस्ताङका सुरक्षा निकायले आ–आफ्नो व्यारेक र कार्यालयमा फुलपाती भित्र्याउने कार्य सम्पन्न गरेका छन् ।

फुलपातीका दिन नेपाली सेनाले सैनिक धुन र शंख बजाउँदै फुलपाती लिन जोमसोममा रहेको गणेश मन्दिरमा पुगेको थियो ।
नेपाली सेनाको नारायण दल गणको नेतृत्वमा फुलपाती भित्र्याईएको हो । फुलपाती लिन गएका सुरक्षाकर्मीले फुलपाती रहेको गणेश मन्दिरमा संयुक्त सलामी अर्पण गरेको सशस्त्र प्रहरी नायव उपरिक्षक यज्ञमान साउथले जानकारी दिए । त्यहाँ राखिएको फुलपातीलाई विधिपूर्वक पुजारीले पुजाआजा गरेको थिए ।
घटस्थापनाको दिनदेखि वैदिक विधिपूर्वक दुर्गा भवानीलाई आह्वान गरी पुजाआजा गरिएको दशैंघर अथवा पुजाकोठामा शुभसाईतको प्रतिकको रुपमा फुलपाती भित्र्याउने गरिन्छ ।बेलपत्र,दारिम,हलेदो, केराको बोट,उखु,धान,जयन्ती र अशोकको फुललाई फुलपातीका दिन घरघरमा स्थापना गरिएको देवी समक्ष अपर्ण गरिने गरिन्छ ।

तपाईको प्रतिक्रिया