जोमसोम– पूर्व वाणिज्य तथा आपूर्ती मन्त्री रोमी गौचन थकालीका छोरा योगेश गौचन थकालीले आसन्न मंसिर ४ गते हुँने प्रतिनिधि सभा सदस्यका लागि नेपाली कांगे्रसका तर्फबाट आईतबार निर्वाचन आयोगमा पुगेर आफ्नो उम्मेदवारी दर्ता गराएका छन् ।

संघीयता अघि २०७० सालको प्रतिनिधि सभा निर्वाचन जितेर मन्त्री बनेका पूर्व वाणिज्य मन्त्री रोमी गौचन थकाली २०७४ सालको प्रतिनिधि सभा सदस्य निर्वाचनमा भने एमालेका उम्मेदवारसंग झिनो मतान्तरले पराजित भएका थिए ।
यसपटक भने पूर्व मन्त्री गौचनले आफु नउठी आफ्नै छोरालाई राजनितिमा प्रत्यक्ष डेभ्यु गराएका हुन् ।

यसअघि पूर्व मन्त्री गौचनको नाम कांग्रेस जनजातीतर्फको समानुपातिक सूचिको ३५ नम्बरमा नाम थियो । उनले समानुपातिक सूचिबाट आफ्नो नाम फिर्ता लिईसकेका छन् ।
मुस्ताङको थासाङ–३ लेते कालोपानी घर भएका प्रतिनिधि सभातर्फको कांग्रेसका तर्फबाट प्रत्यक्ष उम्मेदवार योगेश गौचन थकाली पछिल्लो समय आफ्नो बुवा पूर्व मन्त्री रोमि गौचन थकालीसंगै राजनितिमा सक्रिय थिए । देशको भविष्य निर्माण गर्न र आम जनताको हितका लागि आजको आवश्यकता यूवा पुस्ताको भएकाले आफुन नउठी उत्तराधिकारीलाई अग्रसर गराएको उल्लेख गरे ।

कसकसले दिए उम्मेदवारी
आसन्न मंसिर ४ गते हुँने प्रतिनिधि र प्रदेश सभा निर्वाचनको आज मनोनय दर्ता गर्नेदिन मुस्ताङमा दिउँसो २ पछि मात्रै उम्मेदवार दर्ता प्रक्रिया अघि बढाईएको थियो । मुस्ताङमा रवि लामिछानेको राष्ट्रिय स्वतन्त्र पार्टीले प्रतिनिधि सभा सदस्यका लागि पहिलो उम्मेदवारी दर्ता गराए । योसंगै नेकपा( एमाले)ले उम्मेदवारी मनोनय पत्र दर्ता गरायो ।

एमालेबाट प्रतिनिधि सभा सदस्यका लागि पूर्व सांसद प्रेमप्रसाद तुलाचनले उम्मेदवारी दर्ता गरे । प्रदेशतर्फ ईन्द्रधारा बिष्ट र चन्द्रमोहन गौचनले मनोनयपत्र दर्ता गरे ।
नेपाली कांग्रेसले प्रदेशतर्फको उम्मेदवारी मुस्ताङमै दर्ता गरायो । कांग्रेससहितको सत्ता गठबन्धनका तर्फबाट प्रदेश क मा उपल्लो मुस्ताङ किमलिङका नम्बु गुरुङ र प्रदेश ख तर्फ घरपझोङ–४ जोमसोमका सामाजिक अभियान्ता विकल शेरचनले उम्मेदवारी दर्ता गराएको कांग्रेस श्रोतले जनाएको छ ।
यसैगरी केन्द्रिय तहमा नेकपा(एमाले)संगै चुनावी सहकार्य गरेको राष्ट्रिय प्रजातन्त्र पार्टीले पनि मुस्ताङमा उम्मेदवारी दर्ता गराएको छ । राप्रपाले प्रतिनिधि सभा सदस्यतर्फ घरपझोङ–२ का पूर्व वडाध्यक्ष एवं समाजसेवी मानबहादु विकलाई प्रतिनिधि सभा सदस्य उम्मेदवार बनाएको छ ।

प्रदेश ख तर्फ राप्रपा मुस्ताङका पार्टी अध्यक्ष गुञ्ज हिराचनलाई प्रदेश सभा सदस्य उम्मेदवार बनाएको छ । उनीहरुले दिउँसो ४ बजे मुख्य निर्वाचन अधिकृतको कार्यालयमा पुगेर आ–आफ्नो उम्मेदवारी दर्ता गराएका हुन् ।