पोखरा ।
पोखरा महानगरपालिकाले मंगलबार फेवातालमा सरसफाइ गरेको छ । फेवाताल सरसफाइ अभियानमा पोखराका ३३ वटै वडाका जनप्रतिनिधि सहित ५ हजार बढीको सहभागिता थियो ।

२ सय भन्दा बढी ट्रक फोहोर संकलन गरिएको पोखराका मेयर धनराज आचार्यले जानकारी दिए । अभियानलाई आगामी दिनमा निरन्तरता दिन महानगरले स्थायी संयन्त्र निर्माण गर्ने उनले बताए ।

‘फेवाताल संरक्षण गर्नु तपाई हामी सबैको ड्युटी हो, प्रमुख आचार्यले भने,’ स्थानीय पर्यटन व्यवसायी तथा होटेल व्यवसायीहरूको साथ सहयोग पनि जरुरी छ ।’

पोखरा महानगरपालिका फेवातालको संरक्षण, विकास र प्रवर्द्धन प्रति प्रतिबद्ध रहेको प्रमुख आचार्यले बताएका छन् । तालको छेउका व्यवसायीको ताल संरक्षण तथा सरसफाइमा कम चासो देखिएको प्रति प्रमुख आचार्यले चिन्ता व्यक्त गरे । आफ्नो आसपासको क्षेत्रमा नियमित सरसफाइ गर्न उनीहरूलाई आग्रह गरे ।

सरसफाईका लागि फेवाड्याम, ड्यामसाईड पार्क, केदारेश्वर घाट १, २, फिस्टेल घाट १,२, अम्बोट घाट १,२, नयाँघाट, गौरी घाट १, २, बाराही घाट १, २, नेपाल ट्रष्ट, पाहारी घाट १, २, माछा सेक्सन १, २, फेवाघाट १, २, सुइमिङ्पुल हल्लनचोक १, २, क्याम्पीङ चोक १, २, खहरे घाट, बंगलादी घाट, गैरी चौतारा, वाटर फ्रन्ट, रातेमाटो डाँडा, फ्याउरे घाट दुनाटपरी, क्यारोनोभा खपौदी र इन्द अफ दि लेक गरि ३३ वडा पोइन्टहरु निर्धारण गरिएको थियो ।