पोखरा ।
पोलिटिकल साइन्स सोसाइटी नेपाल(पोस्सोन)ले आसन्न संघीय तथा प्रदेश सभा निर्वाचनलाई लक्षित गरी ६ कात्तिकमा अन्तक्र्रिया गर्न लागेको छ । कास्कीका विभिन्न क्षेत्रबाट उम्मेदवारी दिएका प्रमुख राजनैतिक दलका उम्मेद्वारसँग ‘मंसिर ४, तपाईँ किन उम्मेदवार’ शीर्षकमा कार्यक्रम गर्न लागिएको हो ।

सहभागितामूलक राजनैतिक संस्कार निर्माण गरी राजनीतिको शुद्धीकरणसहित सभ्य समाज निर्माण गर्ने उद्देश्यले पोस्सोन स्थापना भएको हो । कार्यक्रममा प्रमुख राजनैतिक दलका उम्मेद्वारले उनीहरुको व्यक्तिगत विवरण, सामाजिक योगदान, उम्मेदवारीको कारण र आधार, उनीहरु आबद्ध पार्टीको घोषणापत्र, विगतका प्रतिबद्धता के कति पूरा भए, कति भएनन्, नहुनुका कारणका बिषयमा आम जनमानसलाई जानकारी दिने संस्थाका सहसचिव डा सञ्जय कोइरालाले दिए ।

जनप्रतिनिधिलाई जनताप्रति उत्तरदायी बनाउन आउँदा दिनहरुमा पनि यस्ता कार्यक्रम गरिने डा कोइरालाको भनाइ छ ।