रिखिराम जिसी, पोखरा ।
आउँदो मंसिर ४ गते हुने प्रतिनिधि सभा सदस्य निर्वाचनका लागि स्याङ्जा १ बाट एमालेका नारायण मरासिनी र कांग्रेसका राजु थापा तेस्रोपटक चुनावी मैदानमा छन् ।

पहिलोपटक २०७० को निर्वाचनमा चुनावमा होमिएका मरासिनी र थापामध्ये मरासिनी भएका थिए । उनलाई नेपाली कांग्रेसका थापाले पराजित गरेका थिए ।

मरासिनी २०७४ को निर्वाचनमा दोस्रोपटक चुनावमा होमिए । पुरानै प्रतिस्पर्धीसँग मैदानमा उत्रिएका उनले कांग्रेसका थापालाई नै पराजित गर्दै संसद छिर्ने अवसर पाएका पाए ।

२०७४ को निर्वाचनमा मरासिनीले १० हजार ५ सय ६४ मतान्तरले कांग्रेस उम्मेदवार थापालाई पराजित गरेका थिए । मरासिनीले ३९ हजार २ सय २६ र कांग्रेसका थापाले २८ हजार ६ सय ६२ मत प्राप्त गरका थिए । त्यतिबेला मरासिनीलाई बाम गठबन्धनको समर्थन थियो ।

आउँदो मंसिर ४ गते हुने निर्वाचनमा मरासिनी र थापा तेस्रोपटक आमनेसामने भएका छन् । तर यसपटक मरासिनीलाई गठबन्धनको समर्थन रहने छैन । मरासिनी एक्लै चुनावी मैदानमा छन् भने कांग्रेसका थापा माओवादी, एकीकृत समाजवादीसहितको गठबन्धनको साथमा मैदानमा छन् ।

सो क्षेत्रमा प्रतिनिधिसभा सदस्यका लागि ३ स्वतन्त्रसहित १५ जनाको उम्मेदवारी दिएका छन् । तर मुख्य प्रतिस्पर्धा मरासिनी र थापाबीच हुने देखिन्छ । गठबन्धनविरुद्ध एक्लै मैदान उत्रिएका मरासिनीलाई संसद यात्रालाई निरन्तरता दिन सजिलो छैन ।

यसो त पटकपटक परीक्षण भएका कांग्रेसका थापालाई पनि विजयी हासिल गर्न त्यति सहज छैन । गत वैशाखमा भएको स्थानीय तहको निर्वाचनमा यो क्षेत्रमा गठबन्धन बलियो देखिएको छ ।

गठबन्धनले उक्त क्षेत्रमा ३९ हजार ४ सय ९४ र एमालेले ३६ हजार ८ सय ४५ मत प्राप्त गरेको थियो । बैशाखपछि पनि केही मतदाता थपिएका छन् । जसले गर्दा नयाँ मतदाता र चुनावी एजेण्डाले पनि नतिजा फरक ल्याउन सक्छ ।

प्रतिनिधि सभा निर्वाचनका लागि पर्वतमा १२ जनाको उम्मेदवार परेको छ । प्रतिनिधि सभातर्फ एउटा निर्वाचन क्षेत्र रहेको पर्वतमा गठबन्धनबाट उम्मेदवार बनेको कांग्रेसका अर्जुन जोशी र नेकपा एमालेबाट उम्मेदवार बनेका पदम गिरी मुख्य प्रतिस्पर्धी हुन् । जो यसअघि २०७४ सालमा भएको प्रतिनिधि सभा निर्वाचनका प्रतिस्पर्धी हुन् ।

गिरी दोस्रोपटक र अर्जुन चौथोपटक संसद छिर्ने योजनासहित चुनावी मैदानमा होमिएका छन् । कांग्रेसका जोशीले २०५६ सालको संसदीय चुनाव, २०६४ मा भएको पहिलो संविधान सभा निर्वाचन र २०७० को दोस्रो संविधान सभा निर्वाचन जितेका थिए ।

२०७४ को निर्वाचनमा भने गिरीले जोशीलाई पराजित गर्दै जोशीको विजययात्रा रोकेका थिए । त्यतिबेला गिरी एमाले—माओवादीको बाम गठबन्धनसहित चुनावमा गएका थिए ।

२०७४ को निर्वाचनमा गिरीले ३९ हजार २ सय ७५ मत ल्याएर विजयी हुँदा जोशीले २६ हजार ८ सय १९ मत प्राप्त गरेका थिए । एमालेका गिरीसँग झण्डै १२ हजार ४५६ मतान्तरले पराजित भएका जोशी यसपटक वाम लोकतान्त्रिक गठबन्धन रहेकाले त्यति नै मतान्तरले जित्ने दाबी गर्छन् ।

गत वैशाख ३० गते भएको स्थानीय तहको निर्वाचनका सो क्षेत्रमा वडाध्यक्षहरुले पाएको मतका आधारमा एमाले गठबन्धनभन्दा अघि छ । एमालेका वडाध्यक्ष उम्मेदवारले ३५ हजार ७ सय १६ मत पाएका थिए । कांग्रेस माओवादीसहितको गठबन्धनले ३५ हजार २ सय ४ मत पाएका थिए । जुन एमालेभन्दा करिब ५ सय मत कम हो ।

गोरखा १ बाट प्रतिनिधि सभाका लागि मुख्य दलबाट एमालेबाट रामशरण बस्नेत र कांग्रेसबाट राजेन्द्र बजगाई चुनावी मैदानमा छन् । बस्नेत र बजगाई यसअघि २०७४ को प्रदेश सभा निर्वाचनमा गोरखा १ ‘ख’ बाट प्रतिस्पर्धा गरेका थिए ।

त्यतिबेला बाम गठबन्धनकातर्फबाट उम्मेदवार बनेका एमालेका बस्नेतले बजगाईलाई पराजित गर्दै प्रदेश सभामा प्रवेश गरेका थिए । १६ हजार ६ सय ५६ मत पाउँदै विजयी भएका बस्नेत भौतिक पूर्वाधार विकास मन्त्री भएका थिए ।

कांग्रेसका बजगाईले १३ हजार १ मत प्राप्त गरेका थिए । यसपटक भने एमालेका बस्नेत एक्ले रहँदा कांग्रेसका बजगाईलाई माओवादी एकीकृत समाजवादीसहितको गठबन्धनको साथ छ ।

गएको स्थानीय तहको निर्वाचनमा पनि एमाले कमजोर देखिएको छ । गत बैशाख ३० गते भएको स्थानीय तहका निर्वाचनमा उक्त क्षेत्रमा गठबन्धनले ५५ हजार मत प्राप्त गर्दा एमालेले १४ हजार मत प्राप्त गरेको छ ।

स्थानीय तहको प्राप्त गरेको मत तुलना गर्दा गठबन्धन तेब्बर मतले अघि देखिन्छ । यसकारण पनि गठबन्धन दल आफ्नो पक्षमा परिणाम आउनेमा आशावादी देखिन्छन् । यसअघि बाम गठबन्धनबाट विजयी हरिराज अधिकारीले २९ हजार ८ सय ६० र कांग्रेसका चीनकाजी श्रेष्ठले २६ हजार ६ सय ४३ मत प्राप्त गरेका थिए ।