पोखरा ।
नेपाल समाजवादी पार्टी (नेसपा) का अध्यक्ष डा. बाबुराम भट्टराईले आगामी निर्वाचनपछि गण्डकी प्रदेशको मुख्यमन्त्री सुरेन्द्रराज पाण्डे हुने दाबी गरेका छन् ।

गोरखामा आइतबार आयोजित चुनावी कार्यक्रमलाई सम्बोधन गर्दै भट्टराईले चुनावपछि बन्ने प्रदेश सरकारको नेतृत्व पाण्डेले गर्ने बताएका हुन् ।

साथै उनले भोलिको प्रधानमन्त्री माओवादी केन्द्रका अध्यक्ष पुष्पकमल दाहाल प्रचण्ड हुने दाबीसमेत गरे । ‘यहाँ कसैले अन्यथा नमान्नु होला, कमरेड प्रचण्ड भोलिको प्रधानमन्त्री, सुरेन्द्रराज पाण्डे भोलिको मुख्यमन्त्री,’ उनले भने, ‘यही क्षेत्रले प्रधानमन्त्री पनि मुख्यमन्त्री पनि पाइसकेपछि हाम्रो विकासको सपना कसरी पूरा नहोलान् ?’

प्रचण्ड प्रधानमन्त्री र सुरेन्द्रराज पाण्डे गण्डकी प्रदेशको मुख्यमन्त्री भएपछि गोरखा विकासको पुलको काम आफूले गर्ने भट्टराईले बताए । गठबन्धनका उम्मेदवारलाई जिताउन उनले आह्वान समेत गरे ।

माओवादी केन्द्रका अध्यक्ष प्रचण्ड गोरखा क्षेत्र नं. २ बाट प्रतिनिधि सभा सदस्य उम्मेदवार र सुरेन्द्र पाण्डे प्रदेश सभा सदस्य उम्मेदवार हुन् ।