पोखरा ।
कास्की क्षेत्र नम्बर ३ मा पाँच दलीय गठबन्धनका साझा उम्मेदवार रामजीप्रसाद बराल ‘जीवन’ले गठबन्धन विरोधीले धेरै रोक्ने कोसिस गर्दा पनि घट्टेखोला धम्पुस बाटोको योजना पार्न सफल भएको दावी गरेका छन् ।

उनले यो योजना अब टेन्डरमा गइसकेकोले यो बाटोलाई सम्पन्न गर्नुपर्ने जिम्मा पनि आफूहरुकै काँधमा आएको बताए ।

माछापुच्छ्रे गाउँपालिकाको धम्पुसमा आयोजना गरिएको चुनावी सभामा बरालले भने, ‘हामीले यो बाटो ल्याउन पहल गर्‍यौं, विपक्षीहरुले रोक्न धेरै प्रयास गरे, तर हामीले उनीहरुको अवरोध चिर्दै योजना पारेका छौं,’ बरालले भने ।

उनले थाँती रहेका योजना सम्पन्न गर्न र नयाँ योजना सुरुआत गर्न गठबन्धनका उम्मेदवारले जित्नुपर्ने सुनाए ।

भौतिक निर्माणसँगै यहाँको कृषि र पर्यटनमा पनि गुणात्मक विकास गर्नु जरुरी रहेको उनको भनाइ छ । पहाडी र हिमाली क्षेत्रको पर्यावरण जोगाउने चुनौती सामना गर्ने योजना बनाउने उनले वाचा गरे ।

निरन्तरको विकासमार्फत यहाँका जनताको जीवनस्तरमा परिवर्तन गर्नुबाहेक आफ्नो कुनै स्वार्थ नरहेको उनले सुनाए ।