पोखरा ।
यही मंसिर ४ गते हुने निर्वाचनलाई केन्द्रीत गरी पोखरा १९ का मतदान केन्द्रलाई अपांग मैत्री बनाइएको छ । पोखरा १९ मा रहेका अकला मतदान केन्द्र र भारती भवन मतदान केन्द्रलाई अपांग तथा अशक्त मतदान मैत्ती पदमार्ग निर्माण गरिएको वडा नम्बर १९ का सचिव श्रीराम पौडेलले जानकारी दिए ।

प्रदेश निर्वाचन कार्यालय तथा जीवन पद्धति स्वावलम्बन पोखराको सम्वन्यमा आइएफइसीको ३ लाख ५७ हजार ९ सय ७५ रुपैंयाँको लागतमा सो मार्ग निर्माण गरिएको हो । अपांग तथा अशक्त मतदाताले सहज रुपमा मतदान गर्न पाउन भन्ने उद्देश्यले पदमार्ग निर्माण गरिएको वडा नम्बर १९ का अध्यक्ष पुष्पेन्द्र पाण्डेले बताए ।

सो मार्गको वडा अध्यक्ष पाण्डे, सचिव पौडेल लगायतकाले अनुगमन तथा निरीक्षणसमेत गरेका छन् । आगामी मंसिर ४ गते हुने प्रतिनिधि सभा तथा प्रदेश सभा निर्वाचनमा पोखरा १९ मा करिब ८ हजार मतदाता छन् ।

पोखरा १९ को ग्रामीण भेगको रूपमा रहेको घार्मीका मतदाताले घार्मीमा अस्थायी मतदान केन्द्र राख्न पटक पटक माग गरेता पनि सो माग पूरा हुन भने सकेको छैन । मतदान केन्द्र टाढा हुँदा त्यहाँका वृद्ध वृद्धालाई निकै असहज भएको छ । उनीहरू घण्टाैं हिडेर आफ्नो मताधिकार प्रयोग गर्न अकला मतदान केन्द्रमा आउने गरेका छन् ।