पोखरा ।
नेपालकै जेठो म्याराथन ‘पोखरा अन्तर्राष्ट्रिय म्याराथन’ले अन्तर्राष्ट्रिय मान्यता पाएको छ । यसले विश्वभरका दौड ‘वल्र्ड रनिङ’को छाता संगठन एसोसियन अफ म्याराथन एन्ड डिस्टेन्स रेसेस (एम्स)को सदस्यता पाएको हो ।

नेपाली अग्रज खेलाडीको छाता संस्था नेपाल भूतपूर्व खेलाडी मञ्चको आयोजनामा हुँदै आएको पोखरा अन्तर्राष्ट्रिय म्याराथनले १६ औं संस्करण पार गरिसकेको छ भने आगामी फागुन ६ गते १७ औं संस्करण तय छ ।

हालैमात्रै पोखरा अन्तर्राष्ट्रिय म्याराथनको दौड रुटले मान्यता पाएको थियो । लगतै एम्सको समेत सदस्य प्राप्त गर्न सफल भएको मञ्चका अध्यक्ष हरिप्रसाद पराजुलीले बताए । ‘यो हाम्रो लागि निकै गर्वको विषय हो ।

नेपालको जेठो म्याराथनको रुपमा स्थापित पोखरा म्याराथनले अन्तर्राष्ट्रिय मान्यता पाउनु पोखरेली खेलप्रेमीका लागि गौरवको विषय हो,’ पराजुलीले भने ।

एम्सका अध्यक्ष पाको बोराओले मञ्चलाई बधाई दिँदै म्याराथनको अन्तर्राष्ट्रिय यात्रामा सहयात्रा हुने जनाएका छन् ।