पोखरा ।
राष्ट्रिय स्वतन्त्र पार्टीले समानुपातिक सांसदको टुंगो लगाएको छ । केन्द्रीय समितिको शनिबारको बैठकले समावेशिताको सिद्धान्तका आधारमा बन्द सूचीमा अग्रस्थानमा रहेकालाई छनोट गरेको हो ।

पार्टीको निर्णय सार्वजनिक गर्दै प्रवक्ता डा मुकुल ढकालले बन्द सूचीको वरियतामा कुनै पनि छेडछाड नगरी नाम सिफारिस गरिएको बताए । दलिततर्फ २, आदिवासी जनजातितर्फ ३, खस आर्यतर्फ ४, मधेसीतर्फ २, थारुतर्फ १ र मुस्लिमतर्फ १ जना सांसद समानुपातिकतर्फ छनोट गरेको हो ।

छनोट गरिएकोमा कास्कीबाट २ जनाको नाम परेको छ । आदिवासी जनजातितर्फ राष्ट्रिय स्वतन्त्र पार्टीका गण्डकी प्रदेश कमिटी सभापति डा. ढाकाकुमार श्रेष्ठ र दलिततर्फ शिव नेपाली समानुपातिक सांसदका लागि टुंगो लागेका छन् । श्रेष्ठ आदिवासी जनजातितर्फ पहिलो नम्बरमा थिए । नेपाली दलिततर्फ दोस्रो नम्बरमा थिए ।

पहिलो पटक दल दर्ता गरेर निर्वाचनमा होमिएको रवि लामिछाने नेतृत्वको राष्ट्रिय स्वतन्त्र पार्टीले प्रत्यक्ष र समानुपातिकतर्फ गरी २१ सिट प्राप्त गरेको छ । करिब ४ महिनाअघि दल दर्ता गरेको सो पार्टीको यो निर्वाचनमा उल्लेखनीय उपस्थिति रह्यो ।