पोखरा ।
पोखरा महोत्सवको बैंकिङ पार्टनरमा रहेर ग्रिन डेभलपमेन्ट बैंकले साथ दिने भएको छ । शिक्षा, स्वास्थ्य, खेलकुद, पर्यटन प्रवद्र्धनका लागि नयाँ गन्तव्य चिडियाखानाको निर्माणमा पहलकदमीसँगैै सेती नदी संरक्षणमा काम गर्दै आएको युनाइटेड क्लब पोखराले आगामी पुस २७ देखि माघको ९ गतेसम्म महोत्सव गर्दै छ ।

पोखराको अमरसिंह चौरमा हुने ११ औं संस्करणको महोत्सवमा ग्रीन डेभलपमेन्टले बैंकिङ पार्टनरमा रहेर साथ दिने भएको हो । क्लब अध्यक्ष राजु श्रेष्ठ र ग्रीनका कायम मुकायम प्रमुख कार्यकारी अधिकृत हरिबहादुर बुढाथोकीबीच सम्झौता पत्रमा हस्ताक्षर भएको छ ।

बुढाथोकीले गण्डकी प्रदेशको पोखरामा प्रधान कार्यालय रहेको एकमात्र प्रदेश स्तरको ग्रीन बैंकले सामाजिक क्षेत्रमा अग्रणी स्थानमा रहेको युनाइटेड क्लसँगको सहकार्यले आफूहरु निकै उत्साहित भएको बताए । क्लबका अध्यक्ष श्रेष्ठले विभिन्न संघ, संस्थाको सहकार्य र सहयोगकै कारण पोखरा महोत्सव सफल हुँदै आएको उल्लेख गरे ।

महोत्सवको अफिसियल वाटरमा अक्वा रिउसले साथ दिने भएको छ । एक समारोहका बीच पोखरा महोत्सव खानेपानी व्यवस्थापन संयोजक शिव थापा र अक्वा रिउस प्रोसेस पानीका सञ्चालक धीरज गुरुङबीच सम्झौता पत्रमा हस्ताक्षर भएको छ ।

महोत्सवको तयारी तीव्र रुपमा अगाडि बढिरहेको प्रचारप्रसार संयोजक दिनेश सुनारले जानकारी दिए । महोत्सवका ९० प्रतिशत स्टल बुकिङ भएको उनले जानकारी दिए ।