काठमाडौं ।
नेकपा (एकीकृत समाजवादी) ले संसदीय दलको नेतामा अध्यक्ष माधवकुमार नेपाललाई चयन गरेको छ । सोमबार बसेको पार्टीको बैठकले अध्यक्ष नेपाललाई संसदीय दलको नेतामा चयन गरेको हो ।

बैठकपछि सञ्चारकर्मीसँगको पार्टीका महासचिव वेदुराम भुसालले संसदीय दलको नेताको प्रस्तावमा संसदीय दलको उपनेतामा उपाध्यक्ष राजेन्द्रप्रसाद पाण्डे र दलको प्रमुख सचेतकमा उपमहासचिव प्रकाश ज्वालालाई चयन गरेको बताए । महासचिव भुसालले पार्टी अहिले सरकारमा जाने पक्षमा रहेको पनि उल्लेख गरे ।

उनले भने, ‘नेकपा एकीकृत समाजवादी पार्टीको संसदीय दलको पहिलो बैठक सम्पन्न भएको छ । पार्टी अध्यक्ष माधवकुमार नेपाललाई सर्वसहमतिले संसदीय दलको नेता चयन गरिएको छ ।

संसदीय दलको उपनेतामा पार्टीका उपाध्यक्ष राजेन्द्रप्रसाद पाण्डेलाई चयन गरेका छौं । त्यस्तै, संसदीय दलको नेताको प्रमुख सचेतक पनि तोकिएका छन् । प्रमुख सचेतकमा पार्टीका उपमहासचिव प्रकाश ज्वालालाई तोकिएको छ । सरकारमा जाने विषयमा छलफल भएको छैन ।’

उनले गठबन्धनको सरकारमा जाने निर्णय पार्टीले गरे पनि कसको नेतृत्वमा कसरी जाने भन्ने विषयमा छलफल नभएको बताए । ‘हिजोमात्रै पार्टी सचिवालयको बैठक बसेका छौं । बैठकले अहिलेकै गठबन्धनलाई अगाडि बढाएर जाने पक्षमा छौं ।

गठबन्धमा आवश्यक छलफल बढाउने र अन्य दलहरूसँग पनि छलफल गर्ने निर्णय भएको छ’, उनले भने, ‘त्यो निर्णयलाई संसदीय दलको बैठकले समर्थन जनाएको छ। सरकारमा जाने पक्षमा छौं ।’