पोखरा ।
पोखरा महानगरपालिका वडा नं १९ निवासी ज्येष्ठ नागरिक बालुदेवी ढुंगाना सम्मानित भएकी छन् । ज्येष्ठ नागरिक दिवसको अवसरमा वडा कार्यालय पोखरा १९ ले एक कार्यक्रम आयोजना गरी पोखरा महानगरकै ज्येष्ठ नागरिक १ सय ५ वर्षीया ढुंगानालाई सम्मान गरेको हो ।

उनलाई वडाध्यक्ष पुष्पेन्द्र पाण्डे, पोखरा १७ का वडाध्यक्ष राधिका शाही योगी, सदस्य दुर्गादेवी बस्नेत, विकास आचार्य, कल्पना सुनार, वडा सचिव श्रीराम पौडेलले सम्मान गरेका हुन् । वडाध्यक्ष पाण्डेले जेष्ठ नागरिक समाजको दर्पण भएको बताउँदै उनीहरुको सम्मानले समाज नै सम्मानित हुने बताए ।

अर्का वडाध्यक्ष योगीले ज्येष्ठ नागरिकको अधिकारमा सबै पक्ष जिम्मेवार बन्नुपर्ने बताइन् । वडा सचिव श्रीराम पौडेलले ज्येष्ठ नागरिकको अनुभव र अनुभूतिलाई शिक्षाका रूपमा लिई अगाडि बढ्नुपर्नेमा जोड दिए । विसं १९७४ मा पुरून्चौरको ढुंगाना गाउँमा बालुदेवीको जन्म भएका थियो ।