पोखरा ।
त्रिभुवन आर्मी फुटबल क्लबलाई हराउँदै संकटा फुटबल क्लब २२ औं संस्करणको आहा रारा पोखरा गोल्डकप फुटबलको सेमिफाइनलमा प्रवेश गरेको छ । पोखरा रंगशालामा सोमबार विभागीय टोली त्रिभुवन आर्मीलाई ३–१ गोल अन्तरले हराउँदै संकटा सेमिफाइनलमा प्रवेश गरेको हो ।

संकटाको जितमा मेसुके, सुरजज्यु ठकुरी र स्टेफन बिनोङले समान १ गोल गरे । आर्मीका नवयुग श्रेष्ठले १ गोल फर्काए । आर्मीले सुरुआतमा १ गोलको अग्रता लिएको थियो । १४ औं मिनेटमा संकटाका निशान खड्काले आर्मीका दिनेश हेम्जनलाई फउल गर्दै लडाएपछि आर्मीले पेनाल्टी पाएको थियो ।

सोही पेनाल्टीमार्फत नवयुगले गोल गर्दै आर्मीलाई सुरुआती अग्रता दिलाएका थिए । तर अग्रता जोगाउन नसक्दा आर्मी पहिलो खेलबाट घर फर्किनु पर्‍यो ।

खेलको ३६ औं मिनेटमा संकटाका मेसुकेले गोल गर्दै १–१ गोलको बराबरीमा ल्याए । खेलको ७९ औं मिनेटमा सुरजले गोल गर्दै संकटालाई २–१ को अग्रता दिलाए । त्यसपछि खेलको इन्जुरी समयमा स्टेफनले गोल गर्दै संकटालाई ३–१ को जित दिलाए ।

जितसँगै संकटा सेमिफाइलनमा प्रवेश गरेको छ । संकटाले अब सेमिफाइनलमा सशस्त्र प्रहरी बल (एपिएफ) क्लबसँग खेल्नेछ । एपिएफ धरान फुटबल क्लबलाई पराजित गर्दै सेमिफाइलनमा प्रवेश गरेको हो ।

सहारा क्लब पोखराको आयोजना गरेको उक्त प्रतियोगिताको मंगलबार हुने अन्तिम क्वार्टर फाइनलमा मनाङ मस्र्याङ्दी क्लब र भुटनिज युथ एससी अमेरिकाबीच प्रतिस्पर्धा हुनेछ । प्रतियोगिताका विजेताले १२ लाख र उपविजेताले ६ लाख रुपैयाँ पाउनेछ ।